700-دەن استام قازاقستاندىق الەۋمەتتىك جاردەماقىلاردان ءوز ەركىمەن باس تارتقان. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى ايتتى، دەپ حابارلايدى «ادىرنا» ءتىلشىسى.
الەۋمەتتىك تولەمدەردەن ءوز ەركىمەن باس تارتۋعا مۇمكىندىك بەرەتىن تسيفرلىق سەرۆيس قازان ايىندا eGov Mobile ءموبيلدى قوسىمشاسىندا ىسكە قوسىلعان. بۇگىنگى تاڭدا بۇل قىزمەتتى 729 قازاقستاندىق پايدالانعان.
سەرۆيس الەۋمەتتىك تولەمدەر مەن جاردەماقى الۋشىلارعا مەملەكەتتىك ورگاندارعا بارماي-اق، مەملەكەتتىك قولداۋدىڭ جەكەلەگەن تۇرلەرىنەن باس تارتۋ تۋرالى ەلەكتروندى ءوتىنىش بەرۋگە مۇمكىندىك بەرەدى.
ەڭبەك مينيسترلىگى الەۋمەتتىك تولەمدەردەن باس تارتۋ – مىندەت ەمەس، ازاماتتىڭ ءوز ەركىمەن قابىلدايتىن شەشىمى ەكەنىن اتاپ ءوتتى. سەرۆيس، ەڭ الدىمەن، ماتەريالدىق جاعدايى جاقسى، وتباسىنىڭ قاجەتتىلىكتەرىن ءوز بەتىنشە قامتاماسىز ەتە الاتىن ازاماتتارعا ارنالعان. الايدا ومىرلىك جاعدايى وزگەرگەن جاعدايدا ازاماتتار مەملەكەتتىك قولداۋ الۋ ءۇشىن قايتا ءوتىنىش بەرۋگە قۇقىلى.
ايتا كەتەيىك، 2027 جىلعى 1 قاڭتاردان باستاپ الەۋمەتتىك جاردەماقىلاردىڭ ءبىر بولىگى تەك مۇقتاج ازاماتتارعا اتاۋلى تۇردە بەرىلەدى. بۇل مەملەكەت وتباسىنىڭ نەمەسە جەكە تۇلعانىڭ ماتەريالدىق جاعدايىن باعالايتىنىن بىلدىرەدى. وتباسىلاردىڭ ماتەريالدىق جاعدايىن وبەكتيۆتى باعالاۋ ءۇشىن وڭىرلەردە جاردەماقى الۋشىلاردىڭ ۇيلەرىنە بارىپ، تەكسەرۋ جۇرگىزىلەدى.
