كوكشەتاۋدا مەملەكەتتىك قىزمەتشىلەر ادەتتەگى جۇمىس ورنىنداعى رەسمي پىكىر الماسۋدان بولەك، بۇل جولى پىكىرسايىس الاڭىندا ءوزارا سىنعا ءتۇستى. «ىستىق قايرات، نۇرلى اقىل، جىلى جۇرەك» اتتى تۋرنيردە 24 كوماندادان قۇرالعان 72 مەملەكەتتىك قىزمەتشى ءوز ءبىلىمىن، شەشەندىگىن جانە جىلدام ويلاۋ قابىلەتىن ورتاعا سالدى.
اقمولا وبلىسىنىڭ 9 اۋدانى، 12 وبلىستىق باسقارماسى مەن 6 دەپارتامەنتىنىڭ وكىلدەرى قاتىسقان دودادا باستى تالاپ — كوپ سويلەۋ ەمەس، ءوز ويىن ناقتى دالەلدەپ، قارسى تاراپتىڭ ۋاجىنە ساۋاتتى جاۋاپ بەرۋ بولدى. تۋرنير باستالعان ساتتەن-اق پىكىرسايىس الاڭىندا قىزۋ تالقى قالىپتاستى. جەرەبە ارقىلى قارسىلاسىن انىقتاعان كوماندالار قىسقا ۋاقىت ىشىندە تاقىرىپتى تالداپ، ءوزارا مىندەتتەرىن ءبولىستى.
ءىس-شارا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ اقمولا وبلىسى بويىنشا دەپارتامەنتى، اقمولا وبلىسى اكىمدىگىنىڭ پەرسونالدى باسقارۋدىڭ بىرىڭعاي قىزمەتى جانە وبلىستىق ىشكى ساياسات باسقارماسىنىڭ ۇيىمداستىرۋىمەن ءوتتى. اتالعان مەملەكەتتىك ورگانداردىڭ مۇرىندىق بولۋىمەن ۇيىمداستىرىلعان تۋرنير مەملەكەتتىك قىزمەتشىلەردىڭ كاسىبي جانە كوممۋنيكاتيۆتىك داعدىلارىن جەتىلدىرۋگە باعىتتالدى.
ءتۋرنيردىڭ باس تورەشىسى سىرىم بەگەن ويىن ءتارتىبى مەن باعالاۋ تالاپتارىن ءتۇسىندىرىپ، ءار كەزەڭدە كوماندالاردىڭ ارگۋمەنتاتسياسىنا، لوگيكاسىنا، سويلەۋ مادەنيەتىنە، سۇراقتارعا جاۋاپ بەرۋ شەبەرلىگىنە جانە كوماندالىق جۇمىسىنا باعا بەردى.
«پىكىرسايىستىڭ ەرەكشەلىگى — دايىن جاۋاپتىڭ بولماۋىندا. ءار قاتىسۋشى تاقىرىپتى قىسقا ۋاقىتتا سارالاپ، ءوز ويىن جۇيەلەپ، ونى قارسى تاراپقا تۇسىنىكتى تۇردە جەتكىزە ءبىلۋى كەرەك. بۇل مەملەكەتتىك قىزمەتشى ءۇشىن دە ماڭىزدى داعدى. ويتكەنى كۇندەلىكتى جۇمىستا ازاماتتاردىڭ سۇراعىنا جاۋاپ بەرۋ، ءارتۇرلى پىكىردى تىڭداۋ جانە ناقتى شەشىم ۇسىنۋ قاجەت»، — دەدى سىرىم بەگەن.
پىكىرسايىس بارىسىندا قاتىسۋشىلار «زاڭ مەن ءتارتىپ» جانە «ادال ازامات» قاعيداتتارى اياسىنداعى وزەكتى ماسەلەلەردى تالقىلادى. كوماندالارعا تەك ءوز پوزيتسياسىن قورعاۋ جەتكىلىكسىز بولدى. ولار قارسى تاراپتىڭ سۇراعىنا جاۋاپ بەرىپ، ايتىلعان پىكىردى جوققا شىعاراتىن دالەل كەلتىرىپ، ويىنىڭ لوگيكالىق نەگىزىن كورسەتۋى كەرەك.
بىرنەشە ساعاتقا سوزىلعان ىرىكتەۋ كەزەڭدەرىنەن كەيىن ۇزدىك كوماندالار جارتىلاي فينالعا ءوتتى. ال فينالدا باسەكە ودان ءارى كۇشەيدى. كوماندالار سوڭعى مۇمكىندىگىن پايدالانىپ، ءوز پوزيتسيالارىن بارىنشا دالەلدەۋگە تىرىستى.
ناتيجەسىندە ءبىرىنشى ورىندى «اقيقات» كومانداسى جەڭىپ الدى. كوماندا قۇرامىندا اقمولا وبلىسى ءبىلىم باسقارماسىنىڭ اتباسار اۋدانى بويىنشا ءبىلىم ءبولىمىنىڭ باسشىسى مەيرامبەك راحيمجانوۆ، شورتاندى اۋدانى بويىنشا ءبىلىم ءبولىمىنىڭ قىزمەتكەرى نۇركەن شاحمەتوۆ جانە اقمولا وبلىسىنىڭ مەملەكەتتىك ساتىپ الۋ جانە كوممۋنالدىق مەنشىك باسقارماسىنىڭ قىزمەتكەرى حاليدا جولداسحان بار.
«اقيقات» كومانداسىنىڭ مۇشەسى مەيرامبەك راحيمجانوۆ ءۇشىن ءتۋرنيردىڭ ناتيجەسى قوس جەڭىسپەن اياقتالدى. ول كوماندالىق ەسەپتە ءبىرىنشى ورىنعا يە بولىپ قانا قويماي، «ۇزدىك سپيكەر» اتاندى.
«پىكىرسايىس ادامنىڭ ءوز ويىن جەتكىزۋ قابىلەتىن عانا ەمەس، تىڭداي ءبىلۋ مادەنيەتىن دە قالىپتاستىرادى. تۋرنير بارىسىندا ءار تاقىرىپقا ءار قىرىنان قاراۋعا تىرىستىق. جەڭىسكە جەتۋدە كوماندالىق جۇمىستىڭ ماڭىزى زور بولدى. ءبىز دايىندىق كەزىندە ءبىر-ءبىرىمىزدىڭ ويىمىزدى تولىقتىرىپ، ءارتۇرلى پىكىرلەردى تالقىلادىق. ءبىرىنشى ورىنعا يە بولعانىمىزعا قۋانىشتىمىز»، — دەدى مەيرامبەك راحيمجانوۆ.
ال ء«تىل جاناشىرى» نوميناتسياسى اقمولا وبلىسىنىڭ تسيفرلاندىرۋ جانە ارحيۆتەر باسقارماسىنىڭ «سەرپىن» كومانداسىنا بەرىلدى. سونىمەن قاتار «ۇزدىك تورەشى» نوميناتسياسى مۇراتبەك شۇعىلاعا تابىستالدى.
جەڭىمپازدار مەن جۇلدەگەرلەرگە اقشالاي سەرتيفيكاتتار تابىستالدى.بۇل ءتۋرنيردىڭ ءمانى جۇلدە قورىتىندىسىمەن عانا ولشەنبەيدى. مەملەكەتتىك قىزمەتشىلەر ءۇشىن پىكىرسايىس — كۇندەلىكتى قىزمەتتە قاجەت داعدىلاردى شىڭدايتىن پراكتيكالىق الاڭ.
