13 اقپاندا قوستاناي وبلىسى، قامىستى اۋدانىنىڭ ورتالىعىندا اۋدان اكىمدىگى الاڭىندا جۇمىسشى جاڭا جىلدىق بيىكتىگى بەس مەترلىك سىرعاناقتى بولشەكتەۋ كەزىندە بيىكتىكتەن قۇلاپ، قازا تاپتى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدە ەر ادامنىڭ اۋداندىق اۋرۋحانانىڭ جانساقتاۋ بولىمىندە شامامەن 23:00-دە قايتىس بولعانى تۋرالى اقپارات تارادى.
"ماماندار جۇمىستار جۇرگىزۋ كەزىندە قاۋىپسىزدىك تەحنيكاسى ەرەجەلەرىنىڭ بۇزىلعان-بۇزىلماعانىن انىقتاۋدا. ەڭبەك قاۋىپسىزدىگى ەرەجەلەرىن بۇزۋ سالدارىنان ادام ولىمىنە اكەلگەن جاعداي بويىنشا سوتقا دەيىنگى تەرگەۋ باستالدى. وقيعانىڭ بارلىق ءمان-جايى انىقتالۋدا", – دەپ مالىمدەدى قوستاناي وبلىسى پوليتسيا دەپارتامەنتىنىڭ ءباسپاسوز قىزمەتى.
سونىمەن قاتار، بۇل قايعىلى وقيعاعا وبلىستىق دەنساۋلىق ساقتاۋ باسقارماسى دا پىكىر ءبىلدىردى.
"13 اقپان كۇنى ساعات 19:22-دە قامىستى اۋداندىق اۋرۋحاناسىنىڭ قابىلداۋ بولىمىنە 1966 جىلى تۋعان ناۋقاس جەتكىزىلدى. ونىڭ دياگنوزى – "ومىرتقا مەن جامباس سۇيەكتەرىنىڭ كوپتەگەن سىنىعى جانە 1-2 دارەجەلى جاراقاتتىق شوك. ناۋقاستىڭ جاعدايى اۋىر بولعاندىقتان، جانساقتاۋ بولىمىنە جاتقىزىلدى. مەديتسينالىق تەكسەرۋ مەن ەمدەۋ حاتتاماعا سايكەس جۇرگىزىلدى. سوت-مەديتسينالىق ساراپتاما ناتيجەسىندە ناۋقاستىڭ الكوگولدىك ماساڭ كۇيدە بولعانى انىقتالدى. وكىنىشكە قاراي، ساعات 22:40-تا بيولوگيالىق ءولىم تىركەلدى", – دەپ حابارلادى دارىگەرلەر.
