اقمولا وبلىسىندا مەملەكەت باسشىسىنىڭ بىرىڭعاي دروندار ينفراقۇرىلىمىن ەنگىزۋ جونىندەگى تاپسىرماسى اياسىندا پيلوتتىق جوبا ىسكە قوسىلدى.
«بىرىڭعاي دروندار ينفراقۇرىلىمى» اتتى بۇل جوبا مەملەكەتتىك جانە ينفراقۇرىلىمدىق جوبالاردى باسقارۋدىڭ اشىقتىعى مەن تيىمدىلىگىن ارتتىرۋعا باعىتتالعان. جۇيە مەكتەپتەر مەن جولداردىڭ قۇرىلىسىن باقىلاۋعا، جىلۋ جەلىلەرىنىڭ جاي-كۇيىن قاداعالاۋعا، جەر قويناۋىن پايدالانۋ سالاسىنداعى زاڭبۇزۋشىلىقتاردى انىقتاۋعا جانە تۇرعىن ءۇي-كوممۋنالدىق شارۋاشىلىق جۇمىسىنىڭ ساپاسىن جاقسارتۋعا مۇمكىندىك بەرەدى.
وبلىس اكىمدىگىندە وتكەن جيىندا اقمولا وبلىسىنىڭ تسيفرلاندىرۋ جانە ارحيۆتەر باسقارماسى «قازاقتەلەكوم» اق-مەن بىرلەسىپ جوبانى وبلىس اكىمىنە تانىستىردى. پرەزەنتاتسيا بارىسىندا پيلوتسىز ۇشۋ اپپاراتتارىن جەدەل باقىلاۋ مەن تالداۋ جۇرگىزۋدە پايدالانۋ مۇمكىندىكتەرى كورسەتىلدى.
وبلىس اكىمى بۇل باستامانى قولداپ، پيلوتتىق كەزەڭ اياسىندا دروندار كوكشەتاۋ جانە قوسشى قالالارىندا قولدانىلاتىنىن اتاپ ءوتتى. سونىمەن قاتار، شالعاي ەلدى مەكەندەردى تەكسەرۋ ءۇشىن ءموبيلدى دروندار پايدالانىلادى.
«تسيفرلىق تەحنولوگيالار مەملەكەتتىك باسقارۋ سالاسىندا ماڭىزدى ءرول اتقارادى. يننوۆاتسيالىق شەشىمدەر كورسەتىلەتىن قىزمەتتەردىڭ ساپاسىن جاقسارتۋعا عانا ەمەس، سونىمەن قاتار ىقتيمال قاۋىپ-قاتەرلەردى ازايتۋعا مۇمكىندىك بەرەدى. اقمولا وبلىسى وسىنداي وزىق جوبالاردى ەنگىزۋدە پيلوتتىق ءوڭىر بولۋعا دايىن»، – دەدى وبلىس اكىمى مارات احمەتجانوۆ.
جوبانىڭ نەگىزگى ارتىقشىلىقتارىنىڭ ءبىرى – جىلۋ جەلىلەرىنىڭ جاعدايىن درون ارقىلى قاشىقتان باقىلاۋ. بۇل جىلۋ شىعىندارىن انىقتاپ، ولاردى جويۋ بويىنشا ۋاقتىلى شارالار قابىلداۋعا مۇمكىندىك بەرەدى. سونىمەن قاتار، دروندار جەر قويناۋىن پايدالانۋ سالاسىنداعى زاڭ بۇزۋشىلىقتاردى تىركەپ، ەكولوگيالىق نورمالاردىڭ ساقتالۋىن قامتاماسىز ەتەدى.
«قازىرگى تەحنولوگيالاردى پايدالانۋ الەۋمەتتىك نىساندار – مەكتەپتەر مەن جولداردىڭ قۇرىلىسى بارىسىن ناقتى ۋاقىت رەجيمىندە باقىلاۋعا مۇمكىندىك بەرەدى. بۇل پروتسەستەردىڭ اشىقتىعىن قامتاماسىز ەتىپ، تيىمدىلىگىن ارتتىرادى جانە باسقارۋشىلىق شەشىمدەردى جەدەل قابىلداۋعا ىقپال ەتەدى»، – دەپ اتاپ ءوتتى اقمولا وبلىسىنىڭ تسيفرلاندىرۋ جانە ارحيۆتەر باسقارماسىنىڭ باسشىسى ماعجان ەرجان.
جوبانى جۇزەگە اسىرۋ اياسىندا اقمولا وبلىسىنىڭ تسيفرلاندىرۋ جانە ارحيۆتەر باسقارماسىنىڭ باسشىسى ماعجان ەرجان مەن «قازاقتەلەكوم» اق-نىڭ تسيفرلىق بيزنەس ديۆيزيونىنىڭ باس ديرەكتورى ابىلايحان وسپانوۆ ءوزارا ىنتىماقتاستىق تۋرالى مەموراندۋمعا قول قويدى.
ايتا كەتەيىك، تسيفرلىق تەحنولوگيالاردى دامىتۋ جانە زاماناۋي مونيتورينگ قۇرالدارىن پايدالانۋ – ءوڭىردى دامىتۋدىڭ باسىم باعىتتارىنىڭ ءبىرى. ەگەر «بىرىڭعاي دروندار ينفراقۇرىلىمى» پيلوتتىق جوباسى ءساتتى جۇزەگە اسسا، ونى بۇكىل وبلىس اۋماعىندا كەڭەيتۋ جوسپارلانىپ وتىر.
