سقو-دا 250-گە جۋىق اسكەرگە شاقىرىلۋشى رەسەيگە قاشىپ كەتكەن. بۇل تۋرالى وبلىستىق قورعانىس ىستەرى جونىندەگى دەپارتامەنت مالىمدەدى، دەپ حابارلايدى “ادىرنا” ۇلتتىق پورتالى.
پەتروپاۆلسك.news-ءتىڭ اقپاراتىنشا، سقو اكىمدىگىندە وتكەن جيىندا اسكەرگە شاقىرۋ ناۋقانىندا كەزدەسەتىن نەگىزگى ماسەلەلەر ايتىلدى.
«دەموگرافيالىق ۇدەرىستەردىڭ سالدارىنان سقو-دا سوڭعى 10 جىلدا اسكەرگە شاقىرىلۋشىلار سانى 38 مىڭ ادامنان 16 مىڭعا دەيىن ءتۇستى، ياعني 60 % كەمىدى. بۇرىن جىلىنا 1300 جىگىتتى جىبەرۋىمىز كەرەك بولسا، قازىر ول 200 ادامعا عانا قىسقاردى، 1100 ادامدى جاساقتاپ، اتتاندىرۋىمىز كەرەك. وبلىس رەسەيدىڭ قورعان، تۇمەن، ومبى وبلىستارىمەن شەكتەسىپ جاتقاندىقتان بۇل دا اسەر ەتۋدە. اسكەرگە شاقىرۋ ناۋقانى باستالعاندا جىگىتتەرىمىز ەش قيىندىقسىز شەكارا اسىپ كەتەدى. قازىرگى ۋاقىتتا اسكەرگە شاقىرىلۋى ءتيىس 250-دەي ادام وسى كورشى مەملەكەتتە ءجۇر»، - دەيدى وبلىستىق قورعانىس ىستەرى جونىندەگى دەپارتامەنت باستىعىنىڭ ورىنباسارى مارات كارىموۆ.
كەلەسى ماسەلە – جىگىتتەردىڭ دەنساۋلىعىنا قاتىستى. اسكەرگە شاقىرىلۋشىلاردىڭ تەك 15 % عانا مەديتسينالىق كوميسسيادان ىركىلىسسىز وتەدى. 45 % دەنساۋلىعىنا بايلانىستى ءتۇرلى شەكتەۋلەرى بولسا، 40 % بەيبىت جاعدايدا اسكەري قىزمەتكە جارامىسز.
«سونداي-اق اسكەرگە شاقىرىلۋشىلاردى تىركەلگەن مەكەنجايى بويىنشا تاپپاي جاتامىز. اتا-انالاردىڭ كوپشىلىگى بالالارىن اسكەرگە جىبەرگىسى كەلمەيدى، سوندىقتان ونىڭ جۇرگەن جەرىن جاسىرادى، بۇل دا ءبىزدىڭ جۇمىسىمىزدى قيىنداتادى. قازىرگى ۋاقىتتا سقو بويىنشا اسكەري ەسەپتە تۇرعان 967 ادامنىڭ جۇرگەن جەرى بەلگىسىز»، - دەيدى مارات كارىموۆ.
ەسكە سالايىق، قازاقستاندا 1 ناۋرىزدان باستاپ مەرزىمدى قىزمەتكە اسكەرگە شاقىرۋ باستالدى.12 شىلدەگە دەيىن قازاقستان قارۋلى كۇشتەرىنىڭ قاتارى 18-بەن 27 جاس ارالىعىنداعى 18 مىڭنان استام ەر-ازامات تولىعۋى ءتيىس.
