بۇگىن «التاي ءالپىسى» دەمالىس بازاسىندا شىعىس قازاقستان وبلىسىنداعى 2025-2026 جىلعى قىسقى تۋريستىك ماۋسىمنىڭ رەسمي اشىلۋى ءوتتى. وعان جينالعان 1200 ادام قىستىڭ باستالۋىن مەرەكەلىك كوڭىل-كۇيمەن قارسى الدى.
پرەزيدەنت قاسىم-جومارت توقاەۆ ءوز جولداۋىندا مەملەكەتتىك ورگاندار ءۇشىن تۋريزم مەن ينفراقۇرىلىمدى دامىتۋ اركەز باسىم باعىت بولۋى تيىستىگىن اتاپ وتكەن ەدى. ال شىعىس قازاقستان جىل سايىن قىسقى دەمالىس ءۇشىن ەڭ تارتىمدى ايماقتاردىڭ قاتارىندا. 
بۇگىنگى قولايلى اۋا رايى دا تۋريستىك ماۋسىمنىڭ سالتاناتتى اشىلۋىن قىزىقتى وتكىزۋگە مۇمكىندىك بەردى. قولونەرشىلەر جارمەڭكەسىن ارالاپ، ساداقشىلاردىڭ ونەرىن كورگەن قوناقتار ۇلتتىق تاعامداردان دا ءدام تاتتى. شارانىڭ ەڭ ايشىقتى ساتتەرىنىڭ ءبىرى – شاڭعىشىلاردىڭ مەملەكەتتىك تۋمەن جاپپاي سىرعاناۋى بولدى.
ايماق باسشىسى نۇرىمبەت ساقتاعانوۆ قۇتتىقتاۋ سوزىندە وبلىستاعى قىسقى ءتۋريزمدى ارى قاراي دامىتۋدىڭ جانە تۋريستىك ينفراقۇرىلىمدى كۇشەيتۋدىڭ ماڭىزدىلىعىن اتاپ ءوتتى.
سونىمەن قاتار قىسقى ءتۋريزمدى دامىتۋعا بەلسەندى ۇلەس قوسىپ جۇرگەن كاسىپكەرلەر مەن سپورتشىلار، ونىڭ ىشىندە قۇسبەگىلەر، العىس حاتتارمەن ماراپاتتالدى.
ايتا كەتەيىك، «التاي ءالپىسى» – الەمدىك ارەنادا كوزگە تۇسكەن سپورتشىلاردى دايارلايتىن جەر. مۇندا وليمپيادا جۇلدەگەرى يۋليا گالىشەۆا، حالىقارالىق جارىستاردىڭ چەمپيوندارى دميتري رەيحەرد پەن پاۆەل كولماكوۆ سىندى سپورتشىلار جاتتىعادى.
بۇگىندە ءوڭىر قازاقستاننىڭ ءار تۇكپىرىنەن بولەك، قىتايدان جانە رەسەيدەن كەلەتىن تۋريستەردى قابىلدايدى. ولار سىبە كولدەرىنىڭ ايدىنىندا كونكي تەۋىپ، ريددەر مەن التايدا شاڭعىمەن سىرعاناپ، قىسقى سپورت تۇرلەرىمەن اينالىسا الادى.
