اتىراۋ قالاسىنىڭ تۇرعىندارى ءتۇسىرىپ، الەۋمەتتىك جەلىلەردە جاريالاعان اسكەري ۇشاقتىڭ ۇشۋىنا قاتىستى قورعانىس مينيسترلىگى رەسمي تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
ۆەدومستۆونىڭ مالىمەتىنشە، قالا اسپانىندا بايقالعان سۋ-30سم اسكەري-اۋە كۇشتەرىنىڭ جويعىش ۇشاعى جوسپارلى وقۋ-جاتتىعۋ ۇشۋىن ورىنداعان.
مينيسترلىكتىڭ حابارلاۋىنشا، مۇنداي جاتتىعۋ ۇشۋلارى ۇشۋ قۇرامىنىڭ كاسىبي دايارلىعىن جەتىلدىرۋ، ۇشقىشتاردىڭ ماشىقتارىن ساقتاۋ جانە اۆياتسيالىق تەحنيكانى قاۋىپسىز پايدالانۋدى قامتاماسىز ەتۋ ماقساتىندا تۇراقتى تۇردە وتكىزىلەدى. بارلىق ءىس-شارالار بەكىتىلگەن جوسپار مەن قاۋىپسىزدىك تالاپتارىنا سايكەس جۇزەگە اسىرىلادى.
سونداي-اق ۆەدومستۆو ۇشۋدىڭ قالىپتى رەجيمدە وتكەنىن جانە قالا تۇرعىندارىنا ەشقانداي قاۋىپ توندىرمەگەنىن اتاپ ءوتتى.
وسىعان بايلانىستى قورعانىس مينيسترلىگى ازاماتتاردى الەۋمەتتىك جەلىلەردە تارالعان راستالماعان اقپاراتقا سەنبەۋگە جانە تەك مەملەكەتتىك ورگانداردىڭ رەسمي مالىمەتتەرىنە سۇيەنۋگە شاقىردى.
بۇعان دەيىن الەۋمەتتىك جەلىلەردە اتىراۋ قالاسىنىڭ ءارتۇرلى اۋداندارىنىڭ ۇستىمەن ۇشىپ وتكەن اسكەري ۇشاقتىڭ ۆيدەوسى كەڭىنەن تاراعان. كادرلار تۇرعىندار اراسىندا قىزۋ تالقىلانىپ، ونىڭ ۇشۋ سەبەبىنە قاتىستى ءتۇرلى بولجامدار ايتىلعان ەدى.
