شىعىس قازاقستان وبلىسىندا ەكولوگيالىق مادەنيەتتى دامىتۋعا جانە ۆولونتەرلەر قوزعالىسىن قولداۋعا ارنالعان ماڭىزدى ءىس-شارالار ءوتتى.
نەگىزگى شارانىڭ ءبىرى — جاستار مەن ۆولونتەرلەردىڭ «ۇلتتىق ۆولونتەرلىك جەلى» زتب اتقارۋشى ديرەكتورى تاتيانا ميرونيۋكپەن جانە ۆولونتەرلىك سالاسىنىڭ ۇلتتىق ساراپشىسى، ادىسكەر ءارى ترەنەرى ەلەنا امرەەۆامەن كەزدەسۋى.
- كەزدەسۋدە ۆولونتەرلىك قوزعالىستى دامىتۋ، ەكولوگيالىق باستامالاردى جۇزەگە اسىرۋ، جاستاردى قوعامدىق ماڭىزى بار جۇمىستارعا تارتۋ جانە وڭىردەگى ۆولونتەرلىكتى دامىتۋدىڭ الداعى جوسپارى تالقىلاندى، - دەيدى ديالوگ الاڭىنىڭ ۇيىمداستىرۋشىلارى.
سونىمەن قاتار، ستۋدەنتتەر مەن مەكتەپ وقۋشىلارى ءۇشىن «قەدو» قوعامدىق بىرلەستىگىنىڭ جەتەكشىسى تانير ياسسامەن موتيۆاتسيالىق كەزدەسۋ ۇيىمداستىرىلدى. كەزدەسۋدە جاستاردىڭ ازاماتتىق بەلسەندىلىگى، ۆولونتەرلىك جوبالارعا قاتىسۋى، كوشباسشىلىق قاسيەتتەردى دامىتۋ جانە الەۋمەتتىك باستامالاردى جۇزەگە اسىرۋ ماسەلەلەرى جايلى ءسوز قوزعالىپ، قاتىسۋشىلار قوعامدىق قىزمەتتەگى تابىستى تاجىريبەلەرمەن تانىستى.
- كەزدەسۋلەر بارىسىندا ۆولونتەرلەردىڭ ەكولوگيالىق جانە الەۋمەتتىك وزەكتى ماسەلەلەردى شەشۋدەگى رولىنە، سونداي-اق جاستاردى قولداۋ مەن ازاماتتىق قوعامدى دامىتۋعا باعىتتالعان مەملەكەتتىك ساياساتتى ىسكە اسىرۋعا ەرەكشە نازار اۋدارىلدى. سپيكەرلەر ەكولوگيانى ساقتاۋ، حالىقتىڭ ەكولوگيالىق مادەنيەتىن ارتتىرۋ جانە قوعامدىق ىنتىماقتاستىقتى نىعايتۋ ماقساتىنداعى ۆولونتەرلىك قىزمەتكە جاستاردى تارتۋدىڭ ماڭىزىن اتاپ ءوتتى، - دەپ ءتۇسىندىردى ۇيىمداستىرۋشىلار.
ايتا كەتەيىك، كەزدەسۋلەر تاجىريبە الماسۋعا، جاڭا باستامالاردى تالقىلاۋعا جانە جاستار، ۆولونتەرلىك ۇيىمدار مەن مەملەكەتتىك قۇرىلىمدار اراسىنداعى ءوزارا بايلانىستى نىعايتۋعا ارنالعان ءتيىمدى الاڭعا اينالدى. قاتىسۋشىلار ساراپشىلاردان جاڭا ءبىلىم مەن تاجىريبەلىك ۇسىنىستار الىپ، ولاردى الداعى ۋاقىتتا ەكولوگيا سالاسىنداعى ۆولونتەرلىك جوبالاردى دامىتۋدا قولدانباق.
ۇقساس جاڭالىقتار
