قازاقستاننىڭ قورعانىس مينيسترلىگى ەل اۋماعىنان تابىلعان ۇشقىشسىز اپپاراتتاردىڭ قاي مەملەكەتكە تيەسىلى ەكەنىن ازىرگە انىقتاي المادى. بۇل تۋرالى ءماجىلىس كۋلۋارىندا قورعانىس ۆيتسە-ءمينيسترى دارحان احمەديەۆ مالىمدەدى، دەپ حابارلايدى “ادىرنا”.
ونىڭ ايتۋىنشا، الەۋمەتتىك جەلىلەردە تاراعان درون تۋرالى ۆيدەو جاڭا وقيعالارعا قاتىسى جوق. احمەديەۆتىڭ ناقتىلاۋىنشا، بۇل جازبا وتكەن جىلدىڭ 19 ماۋسىمىندا بولعان وقيعاعا قاتىستى.
قازىرگى تاڭدا درونداردىڭ تابىلۋىنا قاتىستى بارلىق وقيعالاردى ارنايى ۆەدومستۆوارالىق جۇمىس توبى تەكسەرىپ جاتىر. ونىڭ قۇرامىنا قورعانىس مينيسترلىگى مەن وزگە دە مەملەكەتتىك ورگانداردىڭ وكىلدەرى ەنگەن. تەرگەۋ اياقتالعاننان كەيىن قوعامعا تولىق اقپارات بەرىلەتىنى ايتىلدى.
ازىرگە تابىلعان ۇشۋ اپپاراتتارىنىڭ شىعۋ تەگى بەلگىسىز كۇيىندە قالىپ وتىر.
ەسكە سالساق، 2025 جىلدىڭ جازىندا قاراقيا اۋدانى تۇرعىندارى بولاشاق ستانتسياسى ماڭىنان درونعا ۇقساس نىساندى تاپقان بولاتىن. سول كەزدە پوليتسيا قۇرىلعى ەلدى مەكەندەردەن الىس جەردەن تابىلعانىن جانە تۇرعىندارعا قاۋىپ جوق ەكەنىن حابارلاعان ەدى.
سونىمەن قاتار، 2025 جىلدىڭ ناۋرىز ايىندا باتىس قازاقستان وبلىسى اۋماعىندا بىرنەشە رەت دروندار مەن ولاردىڭ بولشەكتەرىنە ۇقساس زاتتار تابىلعان. كەيىن قورعانىس مينيسترلىگى اپپاراتتاردىڭ شىعۋ تەگىن انىقتاۋ ءۇشىن اسكەري ماماندار مەن قۇزىرلى ورگاندار قاتىساتىن ارنايى كوميسسيا قۇرىلعانىن مالىمدەگەن بولاتىن.
