بۇگىن شىمكەنت قالاسىندا جاڭا يپپودروم پايدالانۋعا بەرىلدى. جاڭا نىساننىڭ اشىلۋىنا ارنالعان سالتاناتتى شارادا شىمكەنت قالاسىنىڭ اكىمى مۇرات ايتەنوۆ پەن وسى نىساندى سالىپ، شاھارعا تارتۋ ەتكەن BI GROUP كومپانياسىنىڭ باس ديرەكتورى ايدىن راحىمباەۆ قۇتتىقتاۋ ءسوز سويلەدى.
–وسىدان ءبىر جارىم جىل بۇرىن شىمكەنت قالاسىنىڭ حالقىنا جاڭا، زاماناۋي، حالىقارالىق ستاندارتتارعا ساي كەلەتىن يپپودروم سالىپ بەرەمىز دەپ ۋادە بەرگەن بولاتىنبىز. بۇگىن سول ۋادەنى ورىنداپ وتىرمىز. بۇل قازاقستانداعى ەڭ ۇلكەن اتشابار كەشەنى بولىپ وتىر، – دەدى ا.راحىمباەۆ.
قالا اكىمى م.ايتەنوۆ وسىناۋ ۇلكەن كەشەندى ءوز قارجىسىنىڭ ەسەبىنەن سالىپ، شىمكەنت قالاسىنا تارتۋ ەتكەنى ءۇشىن BI GROUP كومپانياسىنىڭ باسشىلىعىنا العىسىن ايتتى.
–بۇگىن ۇلتتىق سپورتتىڭ دامۋىنا اسەر ەتەتىن ۇلكەن، جاڭا، زاماناۋي يپپودرومنىڭ اشىلۋىنا كۋا بولىپ وتىرمىز. بۇل يپپودروم تەك شىمكەنت قالاسىندا عانا ەمەس، بۇكىل قازاقستان بويىنشا ۇلتتىق سپورت تۇرلەرىنىڭ، سونىڭ ىشىندە ات سپورتىنىڭ دامۋىنا تىڭ سەرپىن بەرەدى. سونىڭ دالەلى رەتىندە جاڭا سپورت كەشەنىندە ۇلتتىق سپورت تۇرلەرىنەن حالىقارالىق جارىس وتكەلى وتىر. وعان 1 مىڭنان استام سپورتشى، سونىڭ ىشىندە 126 شەتەلدىك سپورتشىلار كەلىپ قاتىسۋدا، – دەدى مۇرات دۇيسەنبەكۇلى.
يپپودرومنىڭ سالتاناتتى اشىلۋىنا ارنالعان باعدارلامانى ەلىمىزدىڭ ءار ايماعىنان كەلگەن قوناقتار، ءوڭىردىڭ، قالانىڭ دامۋىنا ۇلەس قوسقان قادىرلى ازاماتتار، قر ۇلتتىق سپورت تۇرلەرى قاۋىمداستىعىنىڭ باسشىلىعى، زيالى قاۋىم وكىلدەرى مەن قالا تۇرعىندارى تاماشالادى.
ايتا كەتەيىك، جاڭا يپپودرومدا ەلىمىزدەگى ەڭ ۇلكەن بايگە الاڭى بار. يپپودروم اۋماعىندا 1 500 كورەرمەنگە ارنالعان تريبۋنا، ات ارەناسى بار مانەجدەر، جابىق ستەند عيماراتى، ۆەتەرينارلىق بلوك، 300-دەن استام كولىككە ارنالعان تۇراق قاراستىرىلعان. تريبۋنانىڭ جوعارى قاباتىندا اشىق تەرراسا بار. ۇزىندىعى 2012 مەتر جارىس جولى سالىنعان. كوكپارعا، اتپەن سەكىرۋگە ارنالعان الاڭدار كۆارتستى قۇمدارمەن، تابيعي تاستارمەن بەزەندىرىلگەن. الەمدىك ستاندارتتارعا ساي سالىنعان جاڭا يپپودروم مەگاپوليستەگى حالىقارالىق سپورت جانە ويىن-ساۋىق جارىستارى وتەتىن ورىنداردىڭ بىرىنە اينالىپ وتىر.
