Búgin Shymkent qalasynda jańa ıppodrom paıdalanýǵa berildi. Jańa nysannyń ashylýyna arnalǵan saltanatty sharada Shymkent qalasynyń ákimi Murat Áıtenov pen osy nysandy salyp, shaharǵa tartý etken BI GROUP kompanııasynyń bas dırektory Aıdyn Rahymbaev quttyqtaý sóz sóıledi.
–Osydan bir jarym jyl buryn Shymkent qalasynyń halqyna jańa, zamanaýı, halyqaralyq standarttarǵa saı keletin ıppodrom salyp beremiz dep ýáde bergen bolatynbyz. Búgin sol ýádeni oryndap otyrmyz. Bul Qazaqstandaǵy eń úlken atshabar kesheni bolyp otyr, – dedi A.Rahymbaev.
Qala ákimi M.Áıtenov osynaý úlken keshendi óz qarjysynyń esebinen salyp, Shymkent qalasyna tartý etkeni úshin BI GROUP kompanııasynyń basshylyǵyna alǵysyn aıtty.
–Búgin ulttyq sporttyń damýyna áser etetin úlken, jańa, zamanaýı ıppodromnyń ashylýyna kýá bolyp otyrmyz. Bul ıppodrom tek Shymkent qalasynda ǵana emes, búkil Qazaqstan boıynsha ulttyq sport túrleriniń, sonyń ishinde at sportynyń damýyna tyń serpin beredi. Sonyń dáleli retinde jańa sport kesheninde ulttyq sport túrlerinen halyqaralyq jarys ótkeli otyr. Oǵan 1 myńnan astam sportshy, sonyń ishinde 126 sheteldik sportshylar kelip qatysýda, – dedi Murat Dúısenbekuly.
Ippodromnyń saltanatty ashylýyna arnalǵan baǵdarlamany elimizdiń ár aımaǵynan kelgen qonaqtar, óńirdiń, qalanyń damýyna úles qosqan qadirli azamattar, QR Ulttyq sport túrleri qaýymdastyǵynyń basshylyǵy, zııaly qaýym ókilderi men qala turǵyndary tamashalady.
Aıta keteıik, jańa ıppodromda elimizdegi eń úlken báıge alańy bar. Ippodrom aýmaǵynda 1 500 kórermenge arnalǵan trıbýna, at arenasy bar manejder, jabyq stend ǵımaraty, veterınarlyq blok, 300-den astam kólikke arnalǵan turaq qarastyrylǵan. Trıbýnanyń joǵary qabatynda ashyq terrasa bar. Uzyndyǵy 2012 metr jarys joly salynǵan. Kókparǵa, atpen sekirýge arnalǵan alańdar kvarty qumdarmen, tabıǵı tastarmen bezendirilgen. Álemdik standarttarǵa saı salynǵan jańa ııppodrom megapolıstegi halyqaralyq sport jáne oıyn-saýyq jarystary ótetin oryndardyń birine aınalyp otyr.
