استانادا “Astana Winner 2026” حالىقارالىق كورمەسى EXPO حالىقارالىق كورمە ورتالىعىندا ءوتىپ جاتىر، دەپ حابارلايدى "ادىرنا" ۇلتتىق پورتالى.
كورمەگە 350-دەن استام يت قاتىسىپ، ءتۇرلى ەلدەردەن كەلگەن كينولوگتار مەن حالىقارالىق ساراپشىلار جينالدى. قاتىسۋشىلار اراسىندا ۆەنگريا، شۆەيتساريا جانە قىتاي ەلدەرىنىڭ ماماندارى بار.
ءىس-شاراعا حالىقارالىق كينولوگيالىق فەدەراتسيانىڭ (FCI) پرەزيدەنتى تاماش ياككەل قاتىستى. ول قازاقستاننىڭ ۇيىمعا تولىققاندى مۇشە بولۋىن ماڭىزدى قادام رەتىندە اتاپ ءوتتى.
كورمەدە ەرەكشە نازار قازاق تازىسى تۇقىمىنا اۋدى. شارادا 60-تان استام تازى ۇسىنىلدى. FCI پرەزيدەنتى مۇنداي كولەمدە ءبىر جەردە تازىنى العاش رەت كورگەنىن ايتتى.
"FCI پرەزيدەنتى رەتىندە قازاقستاندى ۇيىمنىڭ تولىققاندى مۇشەسى رەتىندە قۇتتىقتاعىم كەلەدى. ءبىزدىڭ وتباسىمىزعا قوش كەلدىڭىزدەر!" - دەدى ول ءىس-شارادا.
قازاقستان كينولوگتار وداعىنىڭ مالىمەتىنشە، كورمە بارىسىندا يت تۇقىمدارىنىڭ ستاندارتقا سايكەستىگى باعالانىپ، اسىلداندىرۋعا رۇقسات بەرۋ ءتارتىبى ساقتالادى. مامانداردىڭ ايتۋىنشا، بۇل شارالار تۇقىمداردىڭ تازالىعىن ساقتاۋعا جانە سەلەكتسيالىق جۇمىستى رەتتەۋگە مۇمكىندىك بەرەدى.
