تابيعي مونوپوليالاردى رەتتەۋ كوميتەتىنىڭ ەلوردالىق دەپارتامەنتى كەلەر جىلدىڭ 1 قاڭتارىنان باستاپ ەلورداداعى سۋ ءتاريفىنىڭ كوتەرىلۋىنە بايلانىستى جاريا تىڭداۋ وتكىزىپ جاتىر، دەپ حابارلايدى«ادىرنا» ۇلتتىق پورتالى.
«جىل سايىن ابونەنتتەر، ياعني پاتەر سانى كوبەيىپ كەلەدى. قازىرگى ۋاقىتتا 470 مىڭ ابونەنت بولسا، جاقىن ارالىقتا بۇل كورسەتكىش 500 مىڭعا جەتەدى. وسىعان بايلانىستى ۇيىم شتاتىن ۇلكەيتۋ قاراستىرىلۋدا. سۋ ءتاريفىن كوتەرۋ كارىز جەلىلەرىن جوندەۋ مەن قايتا جاڭعىرتۋعا، جابدىقتى جاڭارتۋعا قوسىمشا ينۆەستيتسيالار سالۋعا، ستراتەگيالىق تاۋارلاردىڭ قۇنىن ارتتىرۋعا جانە كاسىپورىن قىزمەتكەرلەرىنىڭ جالاقىسىن ارتتىرۋعا قاجەت»، - دەدى «استانا سۋ ارناسى» مكك باس ديرەكتورى تابيعات زەينۋلقابدەن الماتى اۋدانىنىڭ اكىمدىگىندە وتكەن جاريا تىڭداۋدا.
«استانا سۋ ارناسىنىڭ» حابارلاۋىنشا، بۇگىنگى تاريف اعىمداعى جىلدىڭ ماۋسىمىندا بەكىتىلگەن.
جاڭا جىلدان باستاپ، اۋىز سۋ ءتاريفى حالىق ءۇشىن – 58 تەڭگەدەن 66 تەڭگەگە، ەنەرگيا وندىرەتىن كاسىپورىندار ءۇشىن – 175 تەڭگەدەن 192 تەڭگەگە، بيۋدجەتتىك ۇيىمدار مەن زاڭدى تۇلعالار ءۇشىن – 242 تەڭگەدەن 266 تەڭگەگە دەيىن ارتتىرۋ ۇسىنىلىپ وتىر.
ال سۋ بۇرۋ مەن اعىن سۋدى تازارتۋ ءتاريفىن حالىق ءۇشىن – 45 تەڭگەدەن 53 تەڭگەگە دەيىن، ەنەرگيا وندىرەتىن كاسىپورىندار ءۇشىن – 195 تەڭگەدەن 219 تەڭگەگە، بيۋدجەتتىك ۇيىمدار مەن زاڭدى تۇلعالار ءۇشىن – 250 تەڭگەدەن 279 تەڭگەگە دەيىن كوتەرۋ ۇسىنىلعان.
تەحنيكالىق سۋ بەرۋ ءتاريفىن 40 تەڭگەدەن 43 تەڭگەگە دەيىن ارتتىرۋ كوزدەلگەن.
«كەز كەلگەن ءتاريفتىڭ ءوسۋىن تۇتىنۋشىلار جانە اسىرەسە حالىق اۋىر قابىلدايدى. بۇل رەتتە ءبىز كوكتەمنەن باستاپ تاريفتەردى بەلسەندى كوتەرە باستادىق. بيىل استانادا سۋ ماسەلەسى ورىن الدى. بۇل ءبىر كۇندىك ماسەلە ەمەس، وسى كۇنگە دەيىن قوردالانىپ جينالدى. «استانا سۋ ارناسىنىڭ» جاعدايى دا قانشالىقتى قيىن ەكەنىن كوردىك. استانا تاريف بويىنشا 19-20 ءوڭىر اراسىندا 12-13 ورىندا تۇر، ياعني تاريف تومەن. «استانا سۋ ارناسىنا» قولداۋ قاجەت. تاريفتەردى كوتەرۋدى دە قولداۋ كەرەك»، - دەدى «باسەكەلەستىك ساياساتتى دامىتۋ جانە قورعاۋ ورتالىعى» اق ۆيتسە-پرەزيدەنتى مارات مۇستافين.
جاريا تىڭداۋ قورىتىندىسى بويىنشا، ايتىلعان ەسكەرتۋلەر مەن ۇسىنىستار ەسكەرىلىپ، وتىنىمدەر مۇقيات تالدانعان سوڭ دەپارتامەنت تۇپكىلىكتى شەشىم قابىلدايدى.
«ادىرنا» ۇلتتىق پورتالى
