الماتى وبلىسىندا ايەل ادام 13 جىل بويى كۇيەۋىمنەن قورلىق كورگەنىن مالىمدەپ، كومەك سۇرادى، دەپ حابارلايدى “ادىرنا” ۇلتتىق پورتالى “ينفورمبيۋروعا” سىلتەپ.
34 جاستاعى قامار الپامىس جۇبايىنىڭ زاڭمەن جازالانۋىن تالاپ ەتەدى.
ەر ادامنىڭ زىلدەي جۇدىرىعىنان جاپا شەككەن ايەل پوليتسياعا ارىز جازىپ، كومەك سۇراعان. جابىرلەنۋشىنىڭ ايتۋىنشا، قۇزىرلى ورگان وكىلدەرى 8 ايدان بەرى شاراسىز وتىر.
بۇگىندە ەرلى-زايىپتىلاردىڭ 3 قىزى بار.
ورتا جاستاعى ايەلدىڭ ايتۋىنشا، كۇيەۋى قول كوتەرۋدى نەكە قيعان كۇننەن 3 اي وتكەندە باستاپ، كەيىن ادەت قىلىپ العان.
"مەن سەنى باۋىزداپ ءولتىرىپ تاستايمىن دەپ مويىنىمدى ماشينانىڭ اينەكتەرىنە قاجادى. بىلاي ىشىمنەن ۇرىپ، ەڭكەيگەندە بەتىمنەن ۇراتىن. 2023 جىلى مايدا مەنىڭ ىشەگىم ىرىندەپ كەتتى. جارىلىپ كەتتى. سونىڭ سالدارىنان مەن ءومىر بويى انا بولۋ باقىتىنان ايىرىلدىم”، – دەيدى كەلىنشەك.
تۇرمىستىق زورلىقتىڭ قۇربانى بولعان ايەل باسىنان وتكەن سۇمدىقتى تۋىستارىنان ۇزاق ۋاقىت بويى جاسىرىپ كەلگەنىن دە جاسىرمادى. پوليتسياعا ارىز جازىپ، “تيران” كۇيەۋىنىڭ جازالانۋىن تالاپ ەتكەن.
"ادىلەتسىزدىكتىڭ بۋىنان تۇنشىعامىن. 8 اي بويى 4 رەت جاۋاپ بەردىم، 4 بەتتەستىرۋگە قاتىستىم. ەڭ مىقتى دەگەن ادامداردىڭ ءوزى ماعان ادۆوكات بولسا دا، قاراساي اۋداندىق پوليتسياسى ەشبىر قوزعالىس جاساپ وتىرعان جوق”، – دەيدى كەلىنشەك.
ال الماتى وبلىستىق پوليتسيا دەپارتامەنتى بۇل جايتقا قاتىستى "دەنساۋلىققا قاساقانا زيان كەلتىرۋ" دەرەگى بويىنشا قىلمىستىق ءىس تىركەلگەنىن عانا حابارلادى. سوتقا دەيىنگى تەرگەپ-تەكسەرۋ شەڭبەرىندە زاڭدى شەشىم قابىلداي وتىرىپ، ءمان-جايلاردى جان-جاقتى، تولىق جانە وبەكتيۆتى زەرتتەۋ ءۇشىن زاڭدا كوزدەلگەن بارلىق شارالار قابىلداناتىن بولادى.
"قۇزىرلى ورگان وكىلدەرى قىلمىستىق ءىس بويىنشا كۇدىكتىنىڭ بار-جوعىن ءمالىم ەتپەدى. جابىرلەنۋشىنىڭ سوزىنە سەنسەك، زورلىق كورسەتكەن ازاماتتى ۋاقىتشا قاماۋعا الماق تۇگىلى، شارا قولدانىلماعان. ادىلدىك ىزدەگەن قامار الپامىس ەندى پروكۋراتۋراعا شاعىم تۇسىرمەك”، – دەيدى الماتى وبلىسى پوليتسيا دەپارتامەنتىنىڭ ءباسپاسوز قىزمەتى
