جۋرناليست نۇرسۇلتان قۇرمان پارلامەنتتەن ۇمىتتىلەر اراسىندا دەبات ۇيىمداستىرماق. ول بۇل تۋرالى ءوزىنىڭ Instagram پاراقشاسىندا ايتتى، دەپ حابارلايدى “ادىرنا” ۇلتتىق پورتالى.
ايتۋىنشا، العاشقى دەبات 28 اقپان كۇنى بولادى.
“سايلاۋعا بايلانىستى ۇگىت-ناسيحاتتار باستالىپ كەتتى. مەنىڭ يۋتۋب ارنام تاماشا مۇمكىندىك بەرىپ وتىر: ارنايى دەبات ۇيىمداستىرامىن. تىكەلەي ەفيردە بولادى، 7 بىردەي پارتيانىڭ وكىلدەرى بولادى. پارلامەنتتەن ءۇمىتتى ءارتۇرلى بولىمدەرگە ءبولدىم. ءۇش ءتۇرلى تاقىرىپتى الدىم: اۋىل، مادەنيەت، جاستار. العاشقى پىكىرسايىس 28 اقپاندا بولادى. قاي جەردە بولاتىنىن الدىن-الا ايتامىن”،- دەدى جۋرناليست.
سونداي-اق، ول دەباتتىڭ رەگلامەنتتەرىن دە تانىستىرا كەتتى.
“دەباتتىڭ رەگلامەنتى:
1 راۋند. «تانىستىرۋ». بەرىلگەن تاقىرىپ اياسىندا پارتيانىڭ سايلاۋالدى باعدارلاماسىن 30 سەكۋند ىشىندە ايتىپ شىعۋ.
• باسقاشا ايتقاندا، ءبىر ءستوريزدىڭ ۋاقىتى. اۋىلعا قاتىستى پارتيانىڭ قانداي ۇسىنىستارى بار ەكەنىن 30 سەكۋندتا ايتۋعا بولادى دەپ ويلايمىن. قىزىل ءسوزدىڭ قاجەتى جوق، قىسقالىق – ناقتىلىق.
2 راۋند. «بليتس-سۋالناما». ءار سپيكەرگە 1 مينۋت بەرىلەدى. مودەراتور رەتىندە مەن ارقايسىسىنا تاقىرىپ اياسىندا سۇراقتار قويامىن، 1 مينۋتتا بارىنشا كوپ سۇراققا مازمۇندى جاۋاپ بەرۋ كەرەك.
3 راۋند. «پينگ-پونگ». دەباتقا قاتىسۋشىلاردىڭ ارقايسىسى قارسىلاسىنا تاقىرىپ اياسىندا 1 سۇراق قويىپ، وزىنە قويىلعان 1 سۇراققا جاۋاپ بەرەدى. جەرەبە تارتپايمىز، قاي پارتيا وكىلى كىمگە سۇراق قويعىسى كەلەدى – ءوز ەركى. ادىلدىك ءۇشىن بارلىعىنا بىردەي مۇمكىندىك بەرەمىز. سۇراق قويۋعا 30 سەكۋند – جاۋاپ بەرۋگە 30 سەكۋند قانا بەرىلەدى.
4 راۋند. «قىسقا-نۇسقا». بۇل راۋندتا مودەراتور رەتىندە مەن ءار دەباتەرگە تاقىرىپ اياسىندا 4 سۇراق قويامىن، ءار سۇراققا جاۋاپ بەرۋگە 15 سەكۋند قانا ۋاقىت بەرىلەدى.
5 راۋند. «بليتس-ۇندەۋ». ءار سپيكەرگە دەباتتى قورىتىپ، سايلاۋشىعا ۇندەۋ جاساۋ ءۇشىن 20 سەكۋند بەرىلەدى.
ماسەلەنى توتەسىنەن قويىپ، ناقتى شەشىمىن ايتاتىن ساياساتكەرلەردىڭ زامانى تۋدى!
ەسكەرتۋ. ءار دەبات بەلگىلى ءبىر تاقىرىپقا ارنالاتىن بولعاندىقتان، ۋاقىتتى ءتيىمدى پايدالانۋ ءۇشىن سپيكەرلەرگە بەكىتىلگەن تاقىرىپ اياسىندا سويلەۋگە كەڭەس بەرەمىن”،- دەپ جازدى نۇرسۇلتان قۇرمان.
