قازاقستاننىڭ قوعام قايراتكەرى راۋان شاەكين ءوزىن پارلامەنتتىك سايلاۋعا تىركەمەي وتىرعانىن حابارلادى. بۇل تۋرالى ول Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
ايتۋىنشا، ونىڭ ۇستىنەن زاڭسىز شەشىم شىعارىپ، سايلاۋعا تىركەمەي وتىر.
“مەن، راۋان شاەكين، نەگە بۇگىنگە دەيىن قاراعاندى وبلىسىنداعى №19 وكرۋگتان دەپۋتاتتىققا كانديدات ەكەنىمدى رەسمي تۇردە جاريالاماي وتىرمىن. ءۇش كۇن بولدى جان جاقتان ەل دە، 400 دەن استام سەنىمدى وكىلدەرىم دە مازا بەرمەي حابارلاسۋدا...
سەبەبى، وبلىس بيلىگى مەنىڭ دەكلاراتسيام تۋرالى فيسكالدى ورگاندارعا تاپسىرىس بەرىپ تەمىرتاۋ قالاسىنداعى وكرۋگتىق كوميسسيا 2019 جىلعى جولداسىمنىڭ دەكلاراتسياسىنان كىنا تاۋىپ، مەنىڭ سىرتىمنان، ماعان حابارلاماي، زاڭسىز شەشىم شىعارىپ مەنى تىركەمەي وتىر. تىركەلمەگەنىمدى ورتالىق سايلاۋ كوميسسياسىنىڭ ءتىزىمى شىققاندا بىراق ءبىلدىم! ەكى كۇن بويى تاققان كىنالارىنىڭ زاڭسىز ەكەنىن ءتيىستى ورگاندار ارقىلى دالەلدەپ، مويىنداتسام دا كونبەي، جانتالاسۋدا. ءتىپتى ءتيىستى مەكەمەلەرگە دە قوقان لوقى جاساۋعا كوشتى! ءسويتىپ وبلىس بيلىگى مەنى پارلامەنت سايلاۋىنا قاتىستىرماۋعا بارىن سالۋدا! بۇگىن، ياعني 21.02. ەرىكسىز سوتقا جۇگىندىم، زاڭسىزدىقتارى دالەلدەنەدى دەپ ەسەپتەيمىن، ونى ماعان قارسى بيلىكتە ءبىلىپ وتىر، ولاردىڭ ويى مەنىڭ ۇگىت ناسيحاتقا بولىنگەن ۋاقىتىمدى ۇرلاۋ عانا.
بىر سوزبەن ايتقاندا، مەنىڭ كاسىبي زاڭگەر رەتىندە پارلامەنت ماجىلىسىنە دەپۋتات بولۋ مۇمكىندىگىمنىڭ جوعارى ەكەندىگىن بيلىك وتە جاقسى تۇسىنەدى. ەندىگى امال قولدارىنان كەلسە جول بەرمەۋ. سايلاۋدا تاعى دا ۇزاق جىلدار بويى جالعاسىپ كەلە جاتقان لاس تەحنولوگيا مەن الاياقتىق جاسالۋى ابدەن مۇمكىن. ولار پرەزيدەنت ق. توقاەۆتىڭ سايلاۋدى تازا جانە ءادىل وتكىزۋ تۋرالى تاپسىرمالارىن ءسوز جۇزىندە قولداعانمەن، ءىس جۇزىندە كەرىسىنشە جۇمىس جاساۋدا، اكىمدىكتەر بيلىك قولداپ وتىرعان ۇمىتكەرلەرىنە جاپپاي سەنىمدى وكىلدەر دايىنداپ، سايلاۋعا ارالاسپاۋ تۋرالى پرەزيدەنت تاپسىرماسىن كەرەك قىلماي، اكىم ورىنباسارلارىن وزدەرى تاڭداعان ۇمىتكەرلەردى وتكىزۋگە جاۋاپتى قىپ بەلگىلەپ، تاۋەلسىز ۇمىتكەرلەرگە قارسى جۇمىس جۇرگىزىپ، ولاردىڭ سەنىمدى وكىلدەرىن قورقىتىپ-ۇركىتىپ، سوڭدارىنا اڭدۋشى قويىپ ت.ب. زاڭسىز ارەكەتتەر جاساۋى قالا، وبلىس، پارلامەنت دەپۋتاتتارى سايلاۋىن وتكىزۋ بارىسىندا جاپپاي ورىن الۋدا.
ويتكەنى ولارعا ەل مۇددەسىن قورعاۋدا بيلىككە مازا بەرمەيتىن، ءوز پىكىر-ۇستانىمى بار، پرينتسيپتەرىنە ادال ،تاۋەلسىز دەپۋتاتتار كەرەك ەمەس...”،- دەپ جازدى ول.
سونداي-اق، ول الداعى ۋاقىتتا سايلاۋدان جەڭەتىنىنە سەنىمدى ەكەنىن ايتتى.
“بيلىكتىڭ قولدان ۇيىمداستىرىپ وتىرعان، الەۋمەتتىك شيەلەنىس تۋدىرۋعا باعىتتالعان ، جاساندى ايتىس-تارتىستارى نەمەن اياقتالادى دەگەن وي مازا بەرمەيدى... ءبىر ايدان از ۋاقىتتا سايلاۋ وتەدى ، كەتەدى، ال ءومىر جالعاسا بەرەدى.. بەتتىڭ ارىن بەلگە ءتۇيىپ، سايلاۋدان كەيىن ءومىر توقتايتىنداي كوزدەرىن تۇمان باسقاندار، ەرتەڭ ەلدىڭ الدىندا قالاي كولگىرسيدى؟! ال حالىق ءبارىن ءبىلىپ وتىر...
ۇگىت ناسيحاتقا بەرىلگەن ءبىر اي ۋاقىتىمنىڭ جارتىسىن ۇرلاپ، بوگەت جاساسا دا، قالعان از ۋاقىتتا وكرۋگتەگى 6 قالا 6 اۋداندا ءبارىبىر كەزدەسۋلەر وتكىزىپ، حالىققا بيلىكتىڭ جاساعان قياناتىن جەتكىزىپ، قولداۋلارىنا يە بولىپ، مەن ءوزىمنىڭ جەڭەتىنىمە سەنەمىن!
ال، بيلىكتەگىلەر ماعان جاساپ وتىرعان وسى قياناتتارىنا وكىنەتىن بولادى، ۋاقىتتىڭ ءوزى تورەشى...
تەك قازاق ەلى وسىدان پايدا تابا ما، جوق پا، ماسەلە سوندا ... تۇسىنىستىكپەن قابىلداۋلارىڭىزدى وتىنەمىن. مەن ءۇشىن ەل مۇددەسى بارىنەن جوعارى، مەن حالقىممەن بىرگەمىن!”، - دەپ جازدى راۋان شاەكين.
