ارداگەر جۋرناليست سامات يبرايم ومىردەن ءوتتى. بۇل تۋرالى جۋرناليست باعداگۇل بالاۋباەۆا Facebook پاراقشاسىندا ايتتى، دەپ حابارلايدى “ادىرنا” ۇلتتىق پورتالى.
“مەن ءۇشىن ورنى بولەك ازامات. بولمىسى بولەك تۇلعا. قاراپايىمدىلىعى مەن ەڭبەكقورلىعى وزگەلەرگە ۇلگى باسشى. مەنىڭ جۋرناليستيكاعا كەلۋىمە سەبەپشى رەداكتور... ەندى مىنە، جاقسىلىق شاراپاتىن تيگىزگەن سامات اعا دا، نۇرپەرزەنت اعا دا كەلمەستىڭ كەمەسىنە ءمىنىپ، ەستەلىك جازىپ وتىرمىن. قوش بولىڭىز، جاقسى اعا”، دەپ جازدى باعداگۇل بالاۋباەۆا.
قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى، قازاقستان جۋرناليستيكاسى اكادەمياسىنىڭ اكادەميگى سامات يبرايممەن قوشتاسۋ ءراسىمى 6 قاراشا كۇنى قازاقستان جازۋشىلار وداعىندا وتەدى.
سامات بەكتەنۇلى يبرايم 1955 جىلى 18 ماۋسىم، اتىراۋ وبلىسى، يساتاي اۋدانى، ايباس اۋىلىندا تۋعان. جۋرناليست، زاڭگەر. قازمۋ-ءدىڭ جۋرناليستيكا فاكۋلتەتىن (1982 ج), د.ا.قوناەۆ اتىنداعى گۋمانيتارلىق ۋنيۆەرسيتەتىنىڭ زاڭ فاكۋلتەتىن (1999) بىتىرگەن. ەڭبەك جولىن 1972 جىلى «جايىقمۇنايگاز» باسقارماسىندا وپەراتور بولۋدان باستاعان. 1974-1976 جىلدارى اسكەردە قىزمەت ەتكەن. اتىراۋ وبلىستىق «كوممۋنيستىك ەڭبەك» گازەتىندە ءتىلشى (1982-86), رەسپۋبليكالىق «لەنينشىل جاس» گازەتىنىڭ كاسپي ايماعىنداعى مەنشىكتى ءتىلشىسى (1986-90), قازاقستان رەسپۋبليكاسى پارلامەنتىنىڭ ورگانى بولعان «حالىق كەڭەسى» گازەتىندە ءبولىم مەڭگەرۋشىسى، جاۋاپتى حاتشى، باس رەداكتوردىڭ ورىنباسارى بولىپ ىستەدى (1990-1996). قازاقستان رەسپۋبليكاسى باس پروكۋراتۋراسىنىڭ ءبولىم باستىعى، «زاڭ جانە زامان» – «زاكون ي ۆرەميا» جۋرنالىنىڭ باس رەداكتورى بولدى (1996-2003). «زاڭناما» جشس-ءنىڭ ديرەكتورى، رەسپۋبليكالىق «اقيقات» جۋرنالىنىڭ باس رەداكتورى (2003-2009) بولدى. 2009 جىلدىڭ ناۋرىز ايىنان «انا ءتىلى» گازەتىنىڭ باس رەداكتورى.
«اتىراۋ اقىن-جازۋشىلارىنىڭ كىتاپحاناسى» سەرياسى بويىنشا «عۇمىرلىق ساعىنىش» اڭگىمەلەر جيناعى (2003), «مۇنايشى» قوعامدىق قورى شىعاراتىن «قازاق مۇنايىنىڭ ارداقتىلارى» سەرياسىمەن «سالامات مۇقاشەۆ» (2006), «اسقار قۇلىباەۆ» (2007), «جەتپىسباي ەسەنجانوۆ» (2008) اتتى دەرەكتى عۇمىرنامالىق ەسسە كىتاپتارى باسپادان جارىق كوردى. قازاقستان پروكۋراتۋراسى تاريحى تۋرالى «ءداۋىر داۋىسى» كىتابىنىڭ (1997) قۇراستىرۋشىسى ءارى رەداكتورى. قازاقستان رەسپۋبليكاسى مادەنيەت جانە اقپارات مينيسترلىگىنىڭ باعدارلاماسى بويىنشا «ن.نازارباەۆ – ەتنوسارالىق جانە دىنارالىق قازاقستاندىق كەلىسىمنىڭ نەگىزىن قالاۋشى» اتتى كىتاپتى (2005 ج.), «كاسپي قايراڭى» تانىمدىق باسىلىمىن (2000 ج.), «مادەني مۇرا» مەملەكەتتىك باعدارلاماسىنىڭ كىتاپ سەريالارى بويىنشا «قازاقستاننىڭ قازىرگى زامانعى مادەنيەتتانۋ پاراديگمالارى» دەپ اتالاتىن 10-شى تومدى (2006), «الەمدىك فيلوسوفيالىق مۇرا. حح عاسىرداعى مادەنيەت فيلوسوفياسى» 17-ءشى تومدى (2008) جانە ت.ب ەڭبەكتەردى، تاريح، زاڭ، ەكونوميكا سالاسىنداعى ادەبيەتتەر مەن وقۋ قۇرالدارىن مەملەكەتتىك تىلگە اۋداردى.
