ءماجىلىس دەپۋتاتى گۇلدارا نۇرىموۆانىڭ دۇنيەجۇزىلىك كوشپەندىلەر ويىندارى قارساڭىندا "توعىزقۇمالاق" ويىنىنىڭ اتاۋىن وزگەرتۋ تۋرالى ۇسىنىسىنا قازاقستان جانە دۇنيەجۇزى توعىزقۇمالاق فەدەراتسيالارىنىڭ پرەزيدەنتى ءاليحان بايمەنوۆ جاۋاپ بەردى، دەپ حابارلايدى “ادىرنا” ۇلتتىق پورتالى.
29 مامىر كۇنى ءماجىلىس دەپۋتاتى گۇلدارا نۇرىموۆا دۇنيەجۇزىلىك كوشپەندىلەر ويىندارى قارساڭىندا "توعىزقۇمالاق" ويىنىنىڭ اتاۋىن وزگەرتۋدى ۇسىنعان بولاتىن.
دەپۋتاتتىڭ ۇسىنىسى كەشەلى بەرى عالامتور بەتتەرىندە قىزۋ تالقىلانۋدا. دەپۋتات عالىمدار مەن زەرتتەۋشىلەردىڭ پىكىرىنشە، بۇل ويىننىڭ جالپى اتاۋى – "توعىزات" ەكەنىن ايتتى.
الايدا، بۇگىن، 30 مامىر كۇنى قازاقستان جانە دۇنيەجۇزى توعىزقۇمالاق فەدەراتسيالارىنىڭ پرەزيدەنتى ءاليحان بايمەنوۆ دەپۋتاتتىڭ ۇسىنىسىن قولدامايتىنىن جەتكىزىپ، رەسمي مالىمدەمە جاسادى.
ء"ماجىلىستىڭ بىرنەشە دەپۋتاتى ۇلتتىق مادەني مۇرامىز توعىزقۇمالاقتىڭ اتىن وزگەرتۋ قاجەت دەپ ۇكىمەتكە ساۋال جولداپتى. عاسىرلار بويى حالىق پايدالانىپ كەلگەن ءتول اتاۋدان جيرەنۋ، قاسيەتتى ۇعىمدارعا نەمقۇرايلى قاراۋ - ۇلتتىق قۇندىلىقتار اياسىندا قوعامدى ۇيىستىرۋعا باستامايتىن ءىس ەكەنى ءسوزسىز. كوزىقاراقتى كەز كەلگەن ادام " بۇلار باسقانى قويعاندا ابايدى تانىماي اۋەزوۆتى وقىماعاندار ما؟" دەپ قايران قالعان شىعار. باستاماشىلاردىڭ كىمدى وقيتىنىن بىلمەيمىز ، بىراق قاعيدالى اقيقاتتى تۇسىنبەيتىنى انىق. توعىزقۇمالاق- ۇلتتىڭ مىڭجىلدىق تاريحى بار زياتكەرلىك ويىنى”، - دەپ ايتتى فەدەراتسيا پرەزيدەنتى.
سونداي-اق، ول يۋنەسكو توعىزقۇمالاقتى ادامزاتتىڭ مادەني مۇراسى دەپ 2020 جىلى مويىنداعانىن ايتتى. توعىزقۇمالاق ۇلتىمىزدىڭ الەمدىك مادەنيەتكە قوسقان ۇلەسىنىڭ جارقىن ۇلگىسى.
"سىرتتان كەلگەن ءبىر-ەر ادام ءتۇرلى پيعىلمەن اتاۋىن بۇرمالاسا- ونداي ءتاسىلدى ءبىزدىڭ مادەنيەت پەن تاريحي جادىمىزعا قارسى سىرتقى كۇشتەر تالاي قولدانعانىن تاريحتان دا بىلەمىز. تاريحي، عىلىمي دەرەككوزدەردە، كوركەم جانە اۋىز ادەبيەتىندە ، ۇلتتىڭ جادىندا ويىن تەك توعىزقۇمالاق دەپ اتالادى. ۇلتتىق ويىننىڭ اتاۋى پارلامەنتكە دە، ۇكىمەتكە دە، توعىزقۇمالاق فەدەراتسياسىنا دا تيەسىلى ەمەس. ول ەش ادامنىڭ، نە ۇيىمنىڭ مەنشىگىنە جاتپايدى”، -دەدى ءاليحان بايمەنوۆ.
فەدەراتسيا پرەزيدەنتىنىڭ ايتۋىنشا، ويىننىڭ دا، ونىڭ اتاۋىنىڭ دا يەسى- قازاق حالقى. ءبىزدىڭ پەرزەنتتىك پارىزىمىز - توعىزقۇمالاقتى دامىتىپ، قاناتىن كەڭگە جايۋ.
قازىر الەمنىڭ 50-دەن استام ەلىندە توعىزقۇمالاق كوزبە -كوز وينالسا، ينتەرنەت ارقىلى 100 مەملەكەت تۇرعىندارى ءتۇرلى سايىستارعا قاتىسىپ، 6 الەم چەمپيوناتى 25-30 ەل وكىلدەرىنىڭ قاتىسۋىمەن ءوتتى.
جاhانعا تانىمال زياتكەرلىك ويىندار سايتتارىندا توعىزقۇمالاق كوشباسشى ورىندا. قازاقستاندا 210 مىڭ ادام ءتۇرلى دەڭگەيدە تۇراقتى شۇعىلدانۋدا.
"مۇنىڭ ءبارى ارداگەرلەر، جاتتىقتىرۋشىلار، ويىنشىلاردىڭ ەڭبەگىنىڭ، ولاردى دەمەپ، قولداپ جۇرگەن فەدەراتسيا،توعىزقۇمالاق قايراتكەرلەرى، كاسىپكەرلەر، سپورت جانە تۋريزم مينيسترلىگى مەن جەرگىلىكتى اكىمدىكتەر، ماسليحات دەپۋتاتتارىنىڭ بىرلەسە اتقارىپ جۇرگەن ىستەرىنىڭ جەمىسى”، دەدى قازاقستان جانە دۇنيەجۇزى توعىزقۇمالاق فەدەراتسيالارىنىڭ پرەزيدەنتى.
پرەزيدەنت قاسىم-جومارت توقاەۆتىڭ 2022 جىلى توعىزقۇمالاقتى دامىتۋعا نازار اۋدارۋى ورتاق ىسكە سونى سەرپىن بەردى.
ء"بىز ءارى قاراي دا ۇلتتىق مۇرانى ناسيحاتتاپ، دارىپتەپ، كەڭىرەك تارالۋىنا جۇمىس جاسايمىز. پەرزەنتتىك پارىزىمىزدى اتقارۋعا ەشكىم كەدەرگى بولا المايدى. قازاق باردا توعىزقۇمالاق دامي بەرمەك. ۇلت الدىندا زور مىندەتتەر تۇر. ازامات رەتىندە ەل دامۋىنىڭ وزەكتى ماسەلەلەرى بويىنشا جوعارى مىنبەرلەردەن كەلەلى وي ايتىلعانىن قالايمىز. پىكىر الۋاندىلىعىن سىيلاي وتىرىپ، قاسيەتتى قۇندىلىقتارمەن ويناۋعا بولمايتىنىن مالىمدەيمىز”، - دەدى ءاليحان بايمەنوۆ.
