قوعام بەلسەندىسى، كەرەكۋ ءوڭىرىنىڭ تۋماسى دانيار ءجۇمادىل Cپورت فەدەراتسياسىنىڭ ىشكى قۇرىلىمىنداعى كەلەڭسىزدىكتەرگە قاتىستى پىكىر ءبىلدىرىپ، مەملەكەتتەن بولىنگەن قارجىنىڭ جەلگە ۇشىپ وتىرعانىن حابارلادى، دەپ جازدى "ادىرنا" ۇلتتىق پورتالى.
دانيار ءجۇمادىل ۇلتتىق سپورتتى قولداۋ ماسەلەسىن ايتا كەلىپ، مەملەكەت قارجىسىن ۇلەستىرگەنى ءۇشىن عانا پايدا تاۋىپ وتىرعان «جاۋىنگەرلىك ونەر قاۋىمداستىعىن» سىنادى:
- بۇگىن «Miras» كەڭەسىنىڭ وتىرىسىندا ۇلتتىق سپورتتى قولداۋ ماسەلەسىن ءسوز ەتتىك. پاۆلودار وبلىسىنىڭ سپورت باسقارماسىنىڭ باسشىلىعى ەسەپ بەردى.
وكىنىشكە قاراي، بۇل باعىتتا كەمشىلىك كوپ. جيىندا ءوزىمىز بىلەتىن، باسىمىزدان وتكەرگەن ماسەلەنى كوتەردىم.
كەزىندە ك. ءماسىموۆ بيىگىندە وتىرعان تۇستا ايماقتار بويىنشا بۇيرىقپەن «جاۋىنگەرلىك ونەر قاۋىمداستىعى» قۇرىلعان بولاتىن. ول ۇيىم ءبىزدىڭ ايماقتادا جۇمىس ىستەۋدە. بۇل — سپورت باسقارماسى مەن وزگە سپورت فەدەراتسيالارى اراسىنداعى دەلدال. ارتىق قۇرىلىم!
بۇگىندە ءتۇرلى سپورت فەدەراتسيالارىنا بولىنەتىن ونىسىز دا از قاراجات وسى «جاۋىنگەرلىك ونەر قاۋىمداستىعى» ارقىلى ۇلەستىرىلەدى. نونسەنس! جەكە سپورت قاۋىمداستىقتارىن ەكىنشى قاۋىمداستىققا باعىنىشتى ەتىپ قويعان.ال اراداعى اتالمىش دەلدال ۇيىم بيۋدجەت قاراجاتىن ۇلەستىرگەنى ءۇشىن پايدا تاۋىپ وتىر. ول كىمگە كەرەك؟
وزگە سپورت فەدەراتسيالارى وسى كۇنگە دەيىن بۇل قاتە جۇيەگە تالاي شاعىمداندى. بىراق، «جاۋىنگەرلىك ونەر قاۋىمداستىعى» ءالى جۇمىس ىستەپ تۇر. بۇل كىمگە پايدالى؟
ءسوز سوڭىندا اۆتور قۇزىرلى مەكەمەلەرمەن بايلانىسقانىن حابارلادى. ول تەكسەرىستىڭ جۇرگىزىلۋىن تالاپ ەتتى.
- وسى ماسەلەنى قۇزىرلى ورگانداردىڭ قاراۋىنا جولداۋ تۋرالى شەشىم قابىلدادىق. ءتيىستى تەكسەرۋ ءجۇرۋى ءتيىس، - دەپ جازدى ازامات.
"ادىرنا" ۇلتتىق پورتالى
