2022 جىلى قر قورعانىس مينيسترلىگى قارۋلى كۇشتەر قاتارىندا اسكەري قىزمەتتە بەلگىلەنگەن مەرزىمدە قىزمەت ەتكەن ازاماتتارعا ءبىلىم بەرۋ جەڭىلدىكتەرىن جاساۋ تۋرالى باستاما كوتەردى. ورتالىق كوممۋنيكاتسيالار قىزمەتى الاڭىندا وتكەن بريفينگ بارىسىندا قورعانىس ءمينيسترىنىڭ كەڭەسشىسى ايگۇل تولەمباەۆا اسكەري قىزمەتشىلەرگە قانداي جەڭىلدىكتەر جاسالاتىنى تۋرالى ايتتى، دەپ حابارلايدى «ادىرنا» ءتىلشىسى.
«اسكەردە قىزمەت ەتكەننەن كەيىن ولار زاپاستاعى قاتارداعى جاۋىنگەر بولادى، ال ەگەر ولار وفيتسەرلىك شەن الماق بولسا، وندا اسكەري كافەدراعا ءتۇسىپ، زاپاستاعى لەيتەنانت بولا الادى»، – دەدى سپيكەر.
بۇدان باسقا، مەرزىمدى اسكەري قىزمەت وتكەرگەن جانە جوعارى ناتيجە كورسەتكەن ادامدار ەمتيحانسىز قر قم اسكەري وقۋ ورىندارىنا تۇسە الادى.
جاستارعا جەڭىلدىكتەر الۋ ءۇشىن حقكو-لاردا بەرىلەتىن مەرزىمدى اسكەري قىزمەتتى وتكەرۋ تۋرالى انىقتامانى جانە اسكەري بيلەتتىڭ كوشىرمەسىن، سونداي-اق جوو-عا قاجەت قۇجاتتاردى ۇسىنادى.
«قازىرگى ۋاقىتتا قورعانىس مينيسترلىگىنىڭ باستاماسىن ەل بويىنشا 40-قا جۋىق جوو قولدادى، ولارمەن 100% جەڭىلدىك بەرۋ تۋرالى كەلىسىمدەرگە قول قويىلدى. جالپى ورىندار سانى 3 مىڭعا جۋىق»، - دەدى ايگۇل تولەمباەۆا.
