مەنىڭ بالا كۇنىمدە اۋىلدا شوقشا ساقالدى، مۇرتتى كەلگەن اقساقالدار بولۋشى ەدى. ولار انادايدان اقىرىپ سويلەيتىن:
- كىمنىڭ بالاسىسىڭ؟ - دەپ.
- اكەمنىڭ بالاسىمىن - دەيتىنبىز جامىراي.
- اكەڭنىڭ اتى كىم؟- دەپ داۋىسىن كوتەرەدى.
اركىم ءوز اكەسىن اتايتىن.
- بىلەم-بىلەم... ول اناۋ الگى اتاقتى شوپىر ما، اتاقتى قويشى ما، اتاقتى ۇستاز با؟- دەپ اركىمنىڭ اكەسىن تۇگەندەپ شىعادى.
- رايمىن دەيسىڭ بە، ەەە رايلار سونداي حالىق،- دەپ ءبىراز ونەگەلى اڭگىمە ايتاتىن. اكەسى قايتىس بولعان بالالاردى ۇلكەندەر ءتىپتى جىگەرلەندىرىپ قويادى.
- جارىقتىق اكەڭ مىقتى كىسى ەدى دەپ باستايتىن... جەتىم قوزى مارقايىپ قالادى، جان-جاعىنا ماساتتانىپ "كوردىڭدەر عوي، ەستىدىڭدەر عوي" دەپ.
اۋىل اقساقالدارى بوس جۇرمەيتىن. جازدا ءشوپ شاۋىپ، كەزەكتەن مال توساتىن. قىستا مالعا ءشوپ سالىپ، بوق شىعارىپ، قار كۇرەپ كۇيبەڭ تىرلىكپەن اينالىسىپ جاتادى. قولدارى قالت ەتكەندە، جيىن تويلاردا جاستارعا اقىل-وسيەت ايتاتىن. ءوزارا اڭگىمەلەرى قۇر قاڭقۋ وسەك ەمەس شەجىرە-تاريحتان سىر شەرتەتىن. اقساقالدار تۇنىپ تۇرعان شەجىرە-داستان بولاتىن.
اۋىلداعى اقساقالدىڭ كوبى ارداگەر ەدى. مەكتەپكە سىنىپ ساعاتتارىنا، قارتتار كۇنىندە، جەڭىس كۇنىندە شاقىرامىز. كەۋدەلەرى تولى مەدالمەن كەلەتىن. قازاق ۇعىمىندا اقساقالدىڭ ءوز ورنى، اتقاراتىن ءرولى بار ەدى.
ال، قازىر شە؟
قازىر قارتتار بار، ساقالدىلار بار. قىرماساقال قارتتاردىڭ اۋىزىندا اراق، قىرما مۇرت ساقالدىلاردىڭ اۋىزىندا اللاح.
اقساقالداردىڭ اۋىلىنىڭ الىستاعانىن كەشە جاستار جيىنىندا كوردىم. ءوز ۇرپاعىنا وزگە تىلدە اقىل ايتقان اقساقال، ونى جامىراي ماقتاعان "جىگەرلى جاستار". قىزىلدى-جاسىلدى كيىم، جارقىراعان جۇزدەر كوڭىلدى قۋانتادى. جاقسى-جاقسى تىلەكتەر مەن سوزدەر، قولپاشتاۋلار. ءبارى كەرەمەت. ءبىزدىڭ ەلدە پروبلەما جوق، كورەيلەردىڭ بەتكە جاسايتىن وپەراتسياسىنان ساقتانۋ عانا قالدى. ءتىلدى ساقتاۋ، ۇلت رەتىندە ساقتالىپ قالۋ، ۇلتتىق رۋحسىزدىق-جىگەرسىزدىك قاۋپى تۇرعاندا، بەتتىڭ ءارى ءسوز بولدى. جاستارعا ۇلگى بولاتىن پرەزيدەنتتەن باسقا جان جوق پا؟ ۇلگى بولاتىن، اقىل ايتاتىن اقساقالدار قايدا؟ ازۋى التى قارىس، ارىستانداي اقىرعان، سەن تۇر - مەن اتايىن دەيتىن باۋىرجان سىندى باتىر دا جوق. جاستاردى جەتەلەيتىن، جول كورسەتەتىن اعا بۋىن، اقساقالدار قايدا؟ ستسەناري بويىنشا جاستار جىيىلىپ "كانتسەرت" قويدى. كەدەيلىكتىڭ شەگىنە جەتكەن 7 بالالى انانى بەتىن بوياپ، جىلتىر شاپان جاۋىپ، اۋىزىنا ءسوز سالىپ بەردى. كىمدى كىم الداماقشى بولدى، ۇيىمداستىرۋشىلار حالىقتى قاراڭعى، نادان كورە مە؟ مەملەكەتتىڭ قولداۋىنسىز الەم جۇرتىنا قازاق قىزى دەپ تانىلعان ايشولپان سويلەدى، تولقىپ شىن كوڭىلىمەن. ونەرىمەن الەمگە تانىمال بولعان ديماش نەگە سويلەمەسكە؟ ءسوز دەگەننەن شىعادى 90% قازاق وتىرىپ جينالىستى 90% ورىسشا جۇرگىزۋ قاي ساسقانىمىز؟ جاستارعا نە ۇلگى، نە ونەگە؟
اينۇر ساعيەۆا
"ادىرنا" ۇلتتىق پورتالى
