دارىگەرلەردى قاعازباستىلىقتان بوساتۋ ماسەلەسىن تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قوزعادى. ول كەشە ەلورداداعى سارىارقا اۋدانىنىڭ حالىققا قىزمەت كورسەتۋ ورتالىعىنا بارىپ، قىزمەت تۇرلەرىن الۋعا كەلگەن تۇرعىندارمەن سويلەسكەن بولاتىن، دەپ حابارلايدى “ادىرنا” ۇلتتىق پورتالى.
مينيستر بۇل جونىندە ءوزىنىڭ Telegram ارناسىندا دا جازدى.
“ازاماتتاردىڭ باسىم بولىگى جۇمىسقا ورنالاسۋ بارىسىندا دەنساۋلىعىنا قاتىستى ءتۇرلى انىقتامالاردى الۋ ءۇشىن حكقو كوپتەپ كەلىپ جاتادى. وزىنە-ءوزى قىزمەت كورسەتۋ بۇرىشىندا ازاماتتار ۇيدەن شىقپاي-اق، قانداي قىزمەت تۇرلەرىن الۋعا بولاتىندىعى تۋرالى اقپاراتپەن ءبولىستىم. اتاپ ايتقاندا، پسيحونەۆرولوگيالىق، ناركولوگيالىق، سوتتىلىق بولۋى نەمەسە بولماۋىنا قاتىستى جانە ت.ب انىقتامالاردى eGov Mobile قوسىمشاسى ارقىلى جۇكتەي الادى”، –دەپ جازدى مۋسين ءوزىنىڭ Telegram ارناسىندا.
ودان بولەك، مينيستر ازاماتتارمەن سويلەسۋ بارىسىندا پرەزيدەنتتىڭ بيۋروكراتيانى جويۋ، ارتىق قاعازباستىلىققا جول بەرمەۋ تۋرالى تاپسىرماسى بۇزىلىپ وتىرعانىن جەتكىزدى.
“بارلىق اۋرۋحانالاردىڭ قىزمەتكەرلەرى جىلىنا ءبىر رەت سوتتالماعاندىعى تۋرالى، سىبايلاس جەمقورلىق فاكتىلەرىنىڭ جوقتىعى تۋرالى جانە باسقا دا انىقتامالاردى اكەلۋگە ءماجبۇر بولادى ەكەن. وسىلايشا، ءىس جۇزىندە مەملەكەت باسشىسىنىڭ بيۋروكراتيانى جويۋ، ارتىق قاعازباستىلىققا جول بەرمەۋ تۋرالى تاپسىرماسى بۇزىلۋدا، ياعني بۇنىڭ بىرىڭعاي دەرەكتەر بازاسىنان الۋعا بولادى. وسى جەردە، دەرەۋ تسيفرلاندىرۋعا جاۋاپتى دەنساۋلىق ساقتاۋ ۆيتسە-مينيسترىمەن حابارلاسىپ، ەرتەڭ وبلىستىق جانە قالالىق دەنساۋلىق ساقتاۋ باسقارمالارىنا وسى تالاپتاردىڭ كۇشىن جويۋدى تالاپ ەتىپ، ولاردىڭ كادرلىق قىزمەتتەرىنە، قاجەت بولعان جاعدايدا قىزمەتكەرلەردىڭ كەلىسىمى بويىنشا وسى انىقتامالاردى دەرەكقوردان سۇراتۋعا مۇمكىندىك بەرۋدى تاپسىردىم”، – دەدى مينيستر.
سونىمەن بىرگە ول حالىققا ساپالى ءارى جىلدام قىزمەت ۇسىنۋ ماقساتىندا حالىققا قىزمەت كورسەتۋ ورتالىقتارىنىڭ پەرسونالى ادامدارعا بارىنشا باعدارلانا ءتۇسۋى ءتيىس ەكەندىگىن اتاپ ءوتتى.
“قازىرگى ۋاقىتتا ورتالىقتاردى جاڭعىرتۋ جۇمىستارى جۇرگىزىلىپ جاتىر، ەلوردا دا جانە وڭىرلەردە زاماناۋي حقكو اشىلىپ جاتىر. ءبىز ازاماتتارىمىزدىڭ ىڭعايلىلىعى ءۇشىن بارلىق جاعدايدى جاسايتىن بولامىز!”، – دەپ تۇيىندەدى باعدات مۋسين
