اقش پرەزيدەنتى دجو بايدەن پرەزيدەنتتىككە كانديدات دونالد ترامپتقا جاسالعان قاستاندىق ارەكەتىنە بايلانىستى امەريكا حالقىنا ۇندەۋ جاسادى. ول امەريكالىقتاردى ساياساتتاعى زورلىق-زومبىلىقتان باس تارتۋعا شاقىردى. بۇل تۋرالى ۆۆس جاريالادى، دەپ حابارلايدى ”ادىرنا” ۇلتتىق پورتالى.
«ءبىز ساياساتىمىزدا تەمپەراتۋرانى تومەندەتۋىمىز كەرەك. مۇنداي زورلىق-زومبىلىقتىڭ نورماعا اينالۋىنا جول بەرىلمەۋى ءتيىس. ەلىمىزدەگى ساياسي ريتوريكا وتە قىزا ءتۇستى. ونى سالقىنداتاتىن ۋاقىت كەلدى. مۇنى ىستەۋ – ءبارىمىزدىڭ جاۋاپكەرشىلىگىمىز»، - دەدى بايدەن.
سونداي-اق، ول ساياسات «بەيبىت پىكىرتالاس الاڭى» بولۋى كەرەك ەكەنىن جانە زورلىق-زومبىلىق ەشقاشان جاۋاپ بولا المايتىنىن ايتتى. پرەزيدەنت ترامپقا تەزىرەك ساۋىعىپ كەتۋىن تىلەپ، ميتينگى كەزىندە ونىڭ وتباسى مۇشەلەرىن وقتان قورعاعان 50 جاستاعى كوري كومپەراتورەنى باتىر دەپ اتادى.
ايتا كەتسەك، بۇل - بايدەننىڭ پرەزيدەنتتىك كەزەڭدەگى سوپاقشا كابينەتتەن جاساعان ءۇشىنشى ۇندەۋى. مۇنداي ءسوز سويلەۋ سالىستىرمالى تۇردە سيرەك ءوتىپ، ادەتتە ەڭ ماڭىزدى وقيعالارعا ارنالادى. بايدەن بۇعان دەيىنگى ۇندەۋىن وتكەن جىلدىڭ قازان ايىندا حاماس-تىڭ يزرايلگە شابۋىلىنان كەيىن جاساعان.
بۇعان دەيىن ول 2023 جىلدىڭ ماۋسىمىندا اقش كونگرەسىنەن امەريكالىق قارىز شەگىن ۇلعايتۋعا رۇقسات بەرۋدى تالاپ ەتۋ ءۇشىن ۇلتقا ۇندەۋ جاسادى.
ەسكە سالساق، بۇعان دەيىن اقش-تىڭ پەنسيلۆانيا شتاتىندا سايلاۋالدى اكتسياسى كەزىندە دونالد ترامپقا قاستاندىق جاسالعان بولاتىن.
سەنبى كۇنى بۇرىنعى پرەزيدەنت دونالد ترامپتى ولتىرمەك بولعان ادامنىڭ 20 جاستاعى توماس مەتتيۋ كرۋكس ەكەنى انىقتالدى.
قازاقستان پرەزيدەنتى قاسىم-جومارت توقاەۆ اقش ساياساتكەرى دونالد ترامپقا جاسالعان قاستاندىقتى قاتاڭ ايىپتايتىنىن مالىمدەدى.
