بارار جەر، باسار تاۋى قالماي، قيىندىققا تاپ بولعان كوپبالالى اناعا حالقى شاپاعاتىن توكتى. جۋرناليستەر، قوعام قايراتكەرلەرى مەن ەرىكتىلەر قىتىمىر قىستىڭ سۋىعىندا دالادا قالعان كوپبالالى اناعا قاراجات جيناۋ ءۇشىن ارنايى شوت اشتى. سەگىز كۇن ىشىندە 22 ميلليون تەڭگەدەن استام اقشا جينالدى، دەپ حابارلايدى “ادىرنا” ۇلتتىق پورتالى.
كوپبالالى انا نازيرا دۇيسەباەۆا قۋانىشتان شىققان كوز جاسىن تىيا المادى. ونىڭ جالداپ تۇرىپ جاتقان ءۇيىنىڭ تۇگى قالماي ورتەنىپ، التى بالاسىمەن دالادا قالعان ەدى. دەگەنمەن ابزال انا قونىس تويىن تويدادى. ول حالقىنىڭ دەمەۋىمەن ەكى قاباتتى ۇيگە قول جەتكىزدى، دەپ حابارلايدى otyrar.kz.
قيىندىققا تاپ بولعان كوپبالالى انانىڭ زارىن ەستىگەن جۋرناليستەر، قوعام قايراتكەرلەرى مەن ەرىكتىلەر قاراجات جيناۋ ءۇشىن ارنايى شوت اشتى. سەگىز كۇن ىشىندە ەل ازاماتتارىنان وعان 22 ميلليون تەڭگەدەن استام اقشا كەلىپ ءتۇستى.
"قاتتى قۋانىپ تۇرمىن. بۇل - بالالارىمنىڭ باقىتى. اقىرى ءوز ۇيىمىزگە دە قول جەتكىزدىك. قاراپايىم حالىققا ءارى ماعان كومەكتەسۋگە نيەت بىلدىرگەن بارلىق ادامعا العىسىم شەكسىز. كەزىندە وسى ءۇيدىڭ جانىنان ءوتىپ بارا جاتقاندا، وسىنداي ءۇيىم بولسا عوي، شىركىن دەپ ارمانداۋشى ەدىم، ەندى، مىنە سول ارمانىم ورىندالدى. بالالار كوشىپ كەلىپ، جايعاسىپ جاتىر، بولمەلەردى ءبولىسىپ. ايتقانداي، ورتەنگەن جالدامالى ءۇي "ەلگە قىزمەت" قورىنىڭ ەسەبىنەن تولىقتاي قالپىنا كەلتىرىلدى. ولارعا دا ۇلكەن راقمەت", - دەدى شىمكەنت قالاسىنىڭ تۇرعىنى نازيرا دۇيسەباەۆا.
كوپبالالى انانىڭ قاينار بۇلاق تۇرعىن الابىنداعى جاڭا ءۇيىنىڭ قۇنى 19,5 ميلليون تەڭگەنى قۇرايدى. جينالعان قاراجاتقا نەسيەلەردى دە جابۋ مۇمكىن بولدى.
ء"بىرىنشى كەزەكتە قاراپايىم حالىققا العىس ايتقىم كەلەدى. بارلىعىنا كوپ راقمەت. نازيرا قيىن جاعدايدا قالعاندا ەشكىم شەتتە قالمادى. قوعام بەلسەندىلەرى دە، اكىمدىك تە، قاراپايىم تۇرعىندار دا مۇمكىندىگىنشە كومەكتەستى. ءبىز، ءتىپتى 22 ميلليون تەڭگە جينايتىنىمىزدى ەلەستەتە المادىق. 19,5 ميلليون تەڭگەگە باسپانا، قالعانىنا جيھازدار جانە ت.ب. ساتىپ الىندى. سونداي-اق نازيرانىڭ جەتى نەسيەسى جابىلدى. بارلىعىنا اقشا جەتتى", - دەدى "قاينار بۇلاق" تۇرعىن ءۇي الابىنىڭ باس توراعاسى اقمارال ومىرزاقوۆا
نازيرا دۇيسەباەۆا وسى ۋاقىتقا دەيىن باسپانالى بولعانىنا سەنە الماي ءجۇر. كوپبالالى انا كورسەتكەن كومەگى ءۇشىن كوپكە ءدان ريزا.
“ادىرنا” ۇلتتىق پورتالى
