Qazaqstan prezıdent ákimshiliginiń jáne qalalyq máslıhat depýtattarynyń kelisimi boıynsha Qaraǵandy qalasynyń ákimi bolyp Meıram Muratuly Kojýhov taǵaıyndaldy. Bul týraly Qaraǵandy qalasynyń ákimdigi resmı saıtynda jarııalady, dep habarlaıdy “Adyrna” ulttyq portaly.
Vedomstvonyń málimetinshe, óńir basshysy Ermaǵanbet Bólekpaev qalalyq máslıhattyń kezekten tys sessııasyna qatysyp, ákim laýazymyna Meıram Kojýhovtyń kandıdatýrasyn usynǵan. Depýtattar ony qoldaǵan.
"Meıram Muratuly kóp jyl boıy Qaraǵandyda jumys istedi. Barlyq máselemen tanys. Eń bastysy, qala turǵyndary ony jaqsy biledi. Jınaqtalǵan tájirıbe men bilim Meıram Muratulyna qalanyń áleýmettik-ekonomıkalyq damýynda óziniń áleýetin iske asyrýǵa kómektesedi dep senemin", – deıdi oblys ákimi. Sondaı-aq Ermaǵanbet Bólekpaev jańa ákimniń basty mindeti qaraǵandylyqtardyń ómiri úshin qolaıly jaǵdaı jasaý ekenin atap ótti.
Sonymen qatar ol qala basshysyna oblys ortalyǵyn, ınfraqurylymdy damytýdy jalǵastyrý jáne jylytý maýsymynyń úzdiksiz ótýin qamtamasyz etý mindetterin júktedi. Aıta keteıik, Meıram Kojýhov 1972 jyly dúnıege kelgen. 2001 jyldan bastap memlekettik qyzmette.
Saran mádenıet, jastar saıasaty, sport jáne týrızm bóliminiń bas mamany, Aqtas kentiniń ákimi, Saran qalasy ákiminiń orynbasary, Qaraǵandy qalasy Oktıabr aýdanynyń ákimi qyzmetterin atqarǵan. 2022 jyldyń sáýir aıynan bastap osy taǵaıyndaýǵa deıin Qaraǵandy qalasy ákiminiń orynbasary bolǵan.
