بۇگىن، 15 ناۋرىز كۇنى ەلىمىز بويىنشا جاڭا كونستيتۋتسيانى قابىلداۋ ماسەلەسى بويىنشا رەسپۋبليكالىق رەفەرەندۋم ءوتىپ جاتىر. الماتى وبلىسىندا داۋىس بەرۋگە قۇقىعى بار ازاماتتار تىزىمىنە 1 029 611 ادام ەنگىزىلگەن. ونىڭ ىشىندە 5871 ادام العاش رەت داۋىس بەرە الادى.
وڭىردە 677 رەفەرەندۋم ۋچاسكەسىنىڭ جۇمىسى ۇيىمداستىرىلعان. بارلىق ۋچاسكەلەر قاجەتتى ماتەريالدىق-تەحنيكالىق جابدىقتارمەن تولىق قامتاماسىز ەتىلگەن. اتاپ ايتقاندا، داۋىس بەرۋ كابينالارى، ستاتسيونارلىق جانە تاسىمالدى جاشىكتەر، سونداي-اق كوميسسيا مۇشەلەرى مەن بايقاۋشىلارعا ارنالعان جۇمىس ورىندارى دايىندالعان. داۋىس بەرۋ ساعات 07:00-دەن 20:00-گە دەيىن جالعاسادى. ودان كەيىن داۋىستاردى ساناۋ ءراسىمى باستالادى.
وبلىس ورتالىعى – قوناەۆ قالاسىندا دا وڭىردەگى باسقا ۋچاسكەلەردەگىدەي №949-ءشى رەفەرەندۋم ۋچاسكەسىندە جۇمىس تاڭعى ساعات 07:00-دە قازاقستان رەسپۋبليكاسىنىڭ مەملەكەتتىك گيمنىن ورىنداۋمەن باستالىپ. كەيىن باتا بەرىلدى. باتانى قوناەۆ قالاسى «ارداگەرلەر ۇيىمى» قوعامدىق بىرلەستىگىنىڭ كەڭەس توراعاسى بازارباي ورالباەۆ بەردى. قازاقى داستۇردە مۇنداي يگى تىلەك ماڭىزدى شارالاردىڭ الدىندا ايتىلادى. اقساقال ەلگە تىنىشتىق، بىرلىك پەن بەرەكە تىلەپ، ازاماتتاردى جاۋاپكەرشىلىك پەن پاراساتتىلىققا شاقىردى.
ۋچاسكەلەردە پاندۋستار ورناتىلىپ، ارنايى كورسەتكىشتەر مەن ىڭعايلى داۋىس بەرۋ كابينالارى قاراستىرىلعان. قاجەت بولعان جاعدايدا ۋچاسكەلىك كوميسسيا مۇشەلەرى ازاماتتارعا اقپاراتتىق كومەك كورسەتەدى. دەنساۋلىعىنا بايلانىستى ۋچاسكەگە كەلە المايتىن ازاماتتار ءۇشىن تاسىمالدى جاشىك ارقىلى ۇيدە داۋىس بەرۋ مۇمكىندىگى ۇيىمداستىرىلعان. وڭىردە 2320 مۇمكىندىگى شەكتەۋلى ازاماتتىڭ دەرەكتەرى ناقتىلانىپ، ولاردىڭ قاي ۋچاسكەگە تىركەلگەنى تەكسەرىلگەن.
وڭىردە ينۆاتاكسي قىزمەتى دە ۇيىمداستىرىلعان. وبلىس ورتالىعىندا ەكى ارنايى كولىك قىزمەت كورسەتەدى. سونىمەن قاتار 214 ەلدى مەكەندى قامتيتىن 24 ينۆاتاكسي جۇمىس ىستەيدى. بۇدان بولەك، 15 سۋردواۋدارماشى جانە الەۋمەتتىك قىزمەتكەرلەر تارتىلعان.
رەفەرەندۋمدى وتكىزۋگە وڭىردە ءبىر وبلىستىق، ەكى قالالىق، توعىز اۋداندىق جانە 677 ۋچاسكەلىك كوميسسيا قاتىسۋدا. كوميسسيالاردىڭ قۇرامىندا 4781 ادام جۇمىس ىستەيدى. دايىندىق كەزەڭىندە ولاردىڭ بارلىعى ارنايى وقىتۋدان ءوتتى.
داۋىس بەرۋ بارىسىن قوعامدىق بىرلەستىكتەر مەن ۇكىمەتتىك ەمەس ۇيىمدار وكىلدەرى، سونداي-اق حالىقارالىق ۇيىمدار مەن شەتەلدىك بۇقارالىق اقپارات قۇرالدارىنىڭ وكىلدەرى باقىلاي الادى. مەيرامگۇل ايتوۆانىڭ ايتۋىنشا، الماتى وبلىسىندا رەفەرەندۋمدى باقىلاۋ ءۇشىن 16 وڭىرلىك جانە 11 رەسپۋبليكالىق ۇكىمەتتىك ەمەس ۇيىم اككرەديتتەلگەن. ولار ۋچاسكەلەردە باقىلاۋشى رەتىندە قاتىسۋعا قۇقىلى.
وڭىردە ازاماتتاردىڭ ۋاقىتشا بولاتىن ورىندارىندا ورنالاسقان 36 ۋچاسكە جۇمىس ىستەيدى. ونىڭ 15-ءى اسكەري بولىمدەردە، 16-سى ستاتسيونارلىق ەمدەۋ-پروفيلاكتيكالىق مەكەمەلەردە، 4-ءۋى تەرگەۋ جانە ۋاقىتشا ۇستاۋ يزولياتورلارىندا، ال ءبىر ۋچاسكە ارناۋلى الەۋمەتتىك قىزمەت كورسەتۋ ورتالىعىندا ورنالاسقان. ەگەر بۇل ۋچاسكەلەردە تىزىمگە ەنگىزىلگەن بارلىق ازامات داۋىس بەرسە، ۋچاسكەلىك كوميسسيا داۋىس بەرۋدىڭ اياقتالعانىن مەرزىمىنەن بۇرىن جاريالاي الادى.
ايتا كەتەيىك، زاڭ تالاپتارىنا سايكەس وڭىردەگى جەتى ۋچاسكەدە داۋىس بەرۋ تاڭعى ساعات 06:00-دە باستالدى. قالعان ۋچاسكەلەردە داۋىس بەرۋ كەستە بويىنشا ساعات 07:00-دەن 20:00-گە دەيىن جالعاسادى. ۋچاسكەلەر جابىلعاننان كەيىن داۋىستاردى ساناۋ ءراسىمى باستالادى.
ءدىننىڭ كونستيتۋتسيا دەڭگەيىندە مەملەكەتتەن ءبولىنۋى قوعامدىق كەلىسىمدى نىعايتادى – گۇلزيرا اتاباەۆا
