قاراعاندى وبلىسىنىڭ اتقامىنەرلەرى پرەمەر-مينيستر باقىتجان ساعىنتاەۆتىڭ ساپارىنا قىزۋ دايىندالدى. قالانىڭ جامانىن جاسىرىپ، جاقسىسىن اسىرعىسى كەلدى مە، ايتەۋىر شەنەۋنىكتەردى تولاسسىز جاۋعان جاڭبىردىڭ ءوزى توقتاتا المادى.
سوڭعى ءبىر تاۋلىكتە وسىنداي بەينەجازبالار عالامتور جەلىسىندە قاپتاپ كەتكەن. پرەمەر-ءمينيستردىڭ جەزقازعان قالاسىنا باراتىنى بەلگىلى بولعان سوڭ جەرگىلىكتى كوممۋنالدىق قىزمەتكەرلەر اياقتارىنان تىك تۇردى. ءتىپتى، ءوڭى كەتكەن تەمىر قورشاۋلاردى ءتۇن ورتاسىندا سىرلاۋ ءۇشىن جۇمىسشىلارعا جاڭبىر دا كەدەرگى ەمەس. وبلىس ورتالىعىن رەتكە كەلتىرەمىز دەپ قاراعاندىلىق شەنەۋنىكتەر دە شىر-پىر. قاراعاندى قالاسىندا ءبىر ءتۇننىڭ ىشىندە جولاقتار سىزىلىپ، جولدار ايناداي جارقىراپ شىعا كەلگەن. اسىرەسە، قالانى كوركەيتۋ جۇمىستارى باقىتجان ساعىنتاەۆتىڭ قوزعالىس باعىتى بويىنشا قىزۋ ءجۇرىپ جاتتى. ال جول ساقشىلارى ورتالىق كوشەلەردە ءار مەتر جەردە قوعامدىق ءتارتىپتى باقىلاپ تۇر.
_________________________________________________________________________________________________________________________________
31.kz
