قاراعاندى وبلىسىنىڭ سوتى بىرنەشە اي بويى 13 جاسار قىزدى زورلاعان اۋىل مەشىتىنىڭ قىزمەتكەرىنە قاتىستى ۇكىم شىعاردى، دەپ حابارلايدى "ادىرنا" ۇلتتىق پورتالى Sputnik قازاقستان سايتىنا سىلتەمە جاساپ.
ءىس قاراعاندى وبلىسىنىڭ مامانداندىرىلعان اۋدانارالىق سوتىندا قارالدى. ەر ادام قىلمىستىق كودەكستىڭ 120-بابىنىڭ ءتورتىنشى بولىگى "جاس بالانى زورلاۋ" بويىنشا سوتقا تارتىلدى.
بالانى زورلاۋ 2020 جىلدىڭ 3 قاڭتارىندا باستالعان. سول كۇنى اۋىل مولداسى قىزدىڭ وتباسىنا ءۇي شارۋاشىلىعىنا كومەكتەسكەن. ءبىر ساتتە ول ەرەسەكتەردىڭ ۇيدە بولماعانىن پايدالانىپ، قىزدى زورلاعان.
سودان كەيىن اۋىل مولداسى قىزدى تاعى ءۇش رەت زورلاعان: سول جىلدىڭ اقپان، ناۋرىز جانە ماۋسىم ايىندا. قىز ودان جۇكتى بولدى.
سوتتالۋشىنىڭ كىناسى جابىرلەنۋشىنىڭ، ونىڭ زاڭدى وكىلدەرىنىڭ، كۋاگەرلەردىڭ ايعاعىمەن، ساراپتاما ناتيجەسى جانە ىسكە قاتىستى باسقا دا ماتەريالدارمەن دالەلدەندى. پروكۋرور سوتتان مولدانى 20 جىلعا باس بوستاندىعىنان ايىرۋدى سۇرادى، قىزدىڭ زاڭدى وكىلدەرى دە سونداي جازا تالاپ ەتتى.
ناتيجەسىندە سوت ەر ادامدى 20 جىلعا باس بوستاندىعىنان ايىردى. ول جازاسىن قاتاڭ رەجيمدەگى كولونيادا وتەيدى. سوتتالۋشى ءومىر بويى پەداگوگيكالىق قىزمەتپەن اينالىسۋ جانە كامەلەتكە تولماعاندارمەن جۇمىس ىستەۋ قۇقىعىنان ايىرىلدى.
سوت ۇكىم شىعارعان كەزدە سوتتالۋشىنىڭ بالا كەزىنەن ءۇشىنشى توپتاعى مۇگەدەك ەكەنىن، بۇرىن سوتتالماعانىن، سونداي-اق ءوز كىناسىن ءىشىنارا مويىنداعانىن ەسكەردى.
ۇكىم زاڭدى كۇشىنە ەنگەن جوق.
"ادىرنا" ۇلتتىق پورتالى
