زاڭسىز بايىعانداردان حالىق بايلىعىن حالىققا قايتارۋ كەرەك! قاندى قاڭتار توڭكەرىسىن ۇيىمداستىرعاندار جازالانۋى ءتيىس! بۇل تۋرالى قازىبەك يسا دەپۋتاتتىق ساۋال جولدادى، دەپ حابارلايدى “ادىرنا” ۇلتتىق پورتالى.
“مۇنداي قاسيەتتى قازاق تاريحىنا قارا تاڭبا سالعان قاندى قاسىرەت قايتا قايتالانباۋى ءۇشىن مەملەكەتتىك توڭكەرىس جاساعان كىمدەر؟ باسشىسى كىم؟ ونىڭ ورىنداۋشىلارى كىم؟ تۇگەل انىقتالىپ، جازاعا تارتىلۋى ءتيىس.
جاڭا باياندامالاردى تىڭدادىق. توڭكەرىستە وتتى كوسەۋشىلەر ايتىلدى. كوسەمى كىم؟ اقيقات تولىق ايتىلماسا، ەل سەنىمى جوعالادى، ال مەملەكەتتى ساقتاۋ ءۇشىن ەڭ ءبىرىنشى بيلىككە ەڭ كەرەگى ەلدىڭ سەنىمى. ويتكەنى، سودىرلار جەيتىن سوققىنى مومىندار دا جەپ جاتتى. ال جازىقسىز جازالانباۋى قاجەت ەدى. قاماۋداعىلاردى ازاپتاعاندار قاتاڭ جازالانۋى ءتيىس. جاڭا باياندامادا 329 ازاپتاۋ دەپ ايتىلىپ جاتىر. سوندا ازاپتاۋ اكتسياسى باستالعان با؟ الدە ىشكى ىستەر سالاسىنداعى قالىپتى جاعداي ما؟
ەڭ اۋىرى، قازا تاپقاندار ىشىندە ەل قامى ءۇشىن ەرەۋىلگە شىققاندار دا، ءتىپتى، بەيبىت تۇرعىندار دا كەتتى. جازىقسىز قازا تاپقانداردىڭ ءبارىنىڭ اتى-ءجونى تاۋەلسىزدىكتى قورعاۋدا قۇربان بولعان شەيتتەر رەتىندە اتالۋى ءتيىس. ءبىز ءار وزگەرىس، ءاربىر العا باسقان قادامىمىز ءۇشىن قاڭتار قۇرباندارى الدىندا قارىزدارمىز!
مەملەكەتكە وپاسىزدىق جاساپ، ۇلتقا قاۋىپتى كوميتەتكە اينالعان ۇلتتىق قاۋىپسىزدىك كوميتەتى باسشىلارى، قورعانىس، قۇقىق قورعاۋ باسشىلارى انتتارىنا ادال بولماعانى ءۇشىن قاتاڭ جازاعا تارتىلۋى ءتيىس!
ءبىز ماقتانىپ ايتاتىن ەل بايلىعى قايدا؟ ەكس-پرەزيدەنت ءوزى مويىنداعانداي، “كەز-كەلگەنىن قولىنان سۇيرەپ اپارىپ، سوتتاۋعا بولاتىن” زاڭسىز بايىعانداردان حالىق قازىناسىن حالىققا قايتارۋ كەرەك!”، -دەدى قازىبەك يسا.
