ءماجىلىس دەپۋتاتى ەرمۇرات باپي ۇلتتىق قاۋىپسىزدىكتى قامتاماسىز ەتۋ ماقساتىندا مەملەكەتتىك قۇپيالارعا قول جەتكىزگەن بۇرىنعى جوعارى لاۋازىمدى تۇلعالاردىڭ شەتەلگە شىعۋىن زاڭنامالىق تۇرعىدا رەتتەۋدى ۇسىندى، دەپ حابارلايدى “ادىرنا”.
«بۇل نە قىلعان سۇمەڭدەگەن ءجۇرىس؟! كەزىندە جەكە ءوزى بيلەپ-توستەپ، ءبىر شىبىقپەن ايداعان حالقى پانا بولمايتىنىن سەزگەن سوراقىنىڭ قورلىعى عانا ما؟
البەتتە بۇل تىلەنشەكتىك قازاقستانعا، قازاققا قارايلاس قارەكەت ەمەس، ادەتتەگىدەي تويىمسىز جەكە باستىڭ قامى بولسا كەرەك! سوندىقتان ەلدىڭ قاۋىپسىزدىگىن قامتاماسىز ەتۋ ماقساتىندا مەملەكەتتىك قۇپيانى بىلەتىن تۇلعانىڭ (ەكس-پرەزيدەنت بولسىن، مينيستر نەمەسە باسقا دا لاۋازىمگەر بولسىن) شەت ەلگە شىعۋ مۇمكىندىگىن رەتتەيتىن زاڭ قاجەت شىعار. قالاي ويلايسىڭدار، زاڭگەر-دەپۋتات ارىپتەستەر، ءبىز وسىنداي زاڭعا باستاماشىلىق جاساي الامىز با؟» – دەپ جازدى ول Facebook پاراقشاسىندا.
ءباپي بۇل ماسەلەنى قىتايداعىداي ەميگراتسيانى شەكتەۋ تەتىكتەرىنىڭ حالىقارالىق مىندەتتەمەلەر مەن مەملەكەتارالىق كونۆەنتسيالارعا قانشالىقتى قايشى كەلۋى مۇمكىن ەكەنى تۇرعىسىنان كوتەرىپ وتىرعانىن اتاپ ءوتتى. ونىڭ ايتۋىنشا، دەپۋتاتتاردىڭ وزدەرى دە مەملەكەتتىك قۇپياعا قاتىستى تالاپتاردى ساقتاۋعا مىندەتتى.
«بۇنى سىزدەردەن ەرەكشە سۇراپ وتىرعان سەبەبىم - قىتايداعى سياقتى شەتكە شىعۋدى شەكتەيتىن زاڭ ءبىزدىڭ ەلدىڭ حالىقارالىق مىندەتتەمەلەرى مەن مەملەكەتارالىق كونۆەنتسيالارعا قانشالىقتى قايشى كەلۋى مۇمكىن؟ ماسەلەن، ءبىز دەپۋتات رەتىندە مۇنداي مەملەكەتتىك قۇپيالىق قاجەتتىلىككە مويىنسۇنۋعا ءماجبۇرمىز.
ال بۇعان جانە قوجامجاروۆ سياقتى باسقالارعا ەلدىڭ قاۋىپسىزدىك قامىنا وراي كۇنىبۇرىن شەكارالىق "قىزىل جالاۋشا" قويۋعا بولماي ما؟ بۇل قابىلداۋدىڭ ساياسي مازمۇنىن كرەمل قالاي قابىلدايتىنىن قايدام، ال ەكس-پرەزيدەنتتىڭ ىشىندەگى "قىزىل ءيتى" ەلدىڭ مەملەكەتتىك بيلىگى مەن قازاقستان حالقىنا سەس كورسەتۋى دەپ تۇسىنەمىز بە؟» – دەپ تۇيىندەدى دەپۋتات.
ەسكە سالايىق، بۇعان دەيىن رەسەي پرەزيدەنتى ۆلاديمير پۋتين كرەملدە قازاقستاننىڭ بۇرىنعى پرەزيدەنتى نۇرسۇلتان نازارباەۆپەن كەزدەسكەن بولاتىن. ايتا كەتەيىك، قىزمەتىنەن كەتكەننەن كەيىن ەكس-پرەزيدەنت نازارباەۆ ءپۋتيننىڭ قابىلداۋىندا ءجيى بولىپ تۇرادى. ال 2025 جىلدىڭ باسىندا مەملەكەت باسشىسى قاسىم-جومارت توقاەۆ نازارباەۆتىڭ وتستاۆكادان كەيىن ساياسي ادەپتىلىك تانىتا بەرمەگەنىنە نازار اۋدارعان ەدى.
