2023 جىلعى 1 قاڭتاردان باستاپ پرەزيدەنت قاسىم-جومارت توقاەۆتىڭ تاپسىرماسى بويىنشا بالاباقشا تاربيەشىلەرىنىڭ، مەكتەپ مۇعالىمدەرىنىڭ، كوللەدج وقىتۋشىلارىنىڭ، ادىسكەرلەردىڭ، قوسىمشا ءبىلىم بەرۋ پەداگوگتەرىنىڭ جالاقىسى تاعى 25%-عا ءوستى. وسىلايشا، مۇعالىمدەردىڭ جالاقىسى قازىرگى ۋاقىتتا ەكى ەسەگە ارتتى، دەپ حابارلايدى «ادىرنا» ءتىلشىسى وقۋ-اعارتۋ مينيسترلىگىنە سىلتەمە جاساپ.
«ەل پرەزيدەنتىنىڭ قولداۋى ارقاسىندا مۇعالىمدەردىڭ جالاقىسى جىل سايىن ءوسىپ كەلەدى. سونىمەن قاتار ولاردىڭ جالاقىسىنا قوسىمشا تولەمدەر بەلگىلەندى. بۇل - بىلىكتىلىك ساناتى، ماگيستر دارەجەسى، پاندەردى اعىلشىن تىلىندە جۇرگىزۋ، داپتەرلەردى تەكسەرۋ، سىنىپ جەتەكشىلىگى، جاڭارتىلعان مازمۇنداعى جۇمىس جانە تالىمگەرلىك ءۇشىن قوسىمشا تولەمدەر. مۇعالىمدەردىڭ جالاقىسىن كوتەرۋ ءوز ناتيجەسىن بەرىپ جاتىر. پەداگوگ ماماندىعىنا ۋنيۆەرسيتەتتىڭ ۇزدىك تۇلەكتەرى مەن «التىن بەلگى» يەگەرلەرى كەلە باستادى. بۇل بولاشاقتا بالالاردىڭ وقۋىنا وڭ اسەرىن تيگىزەدى»، - دەدى قر وقۋ-اعارتۋ ءمينيسترى عاني بەيسەمباەۆ.
دەنە شىنىقتىرۋ مۇعالىمدەرىنە ساباقتان تىس قوسىمشا سپورت سەكتسيالارىن وتكىزگەنى ءۇشىن دە قوسىمشا اقى قاراستىرىلعان. بيىلعى قىركۇيەك ايىنان باستاپ كادر تاپشىلىعى بار وڭىرلەرگە تارتىلعان مۇعالىمدەرگە لاۋازىمدىق جالاقىسىنىڭ 150% مولشەرىندە قوسىمشا تولەم بەلگىلەندى.
مۇعالىمدەردىڭ جالاقىسى ءبىلىم دەڭگەيىنە، بىلىكتىلىگىنە، جۇمىس وتىلىنە، وقۋ جۇكتەمەسىنە، ماگيستر دارەجەسىنە جانە باسقا دا قوسىمشا تولەمدەرگە بايلانىستى ەسەپتەلەدى.
