"ش.ايمانوۆ اتىنداعى "قازاقفيلم" كينوستۋدياسىنىڭ" ديرەكتورى ازامات ساتىبالدى قىزمەتكەردىڭ جالاقى تۋرالى شىعارعان داۋىنا قاتىستى جاۋاپ بەردى، دەپ حابارلايدى "ادىرنا" ۇلتتىق پورتالى.
16 شىلدە كۇنى "قازاقفيلم" اۋماعىندا قازاق انيماتسياسىنىڭ قىزمەتكەرلەرى جالاقى ماسەلەسىنە قاتىستى شەرۋ ۇيىمداستىرعان بولاتىن. ولاردىڭ سوزىنشە، "التىن ادام" تولىقمەترلى جوباسىنىڭ قىزمەتكەرلەرى 1 جىلدان بەرى وزدەرىنە تيەسىلى جالاقىنى الا الماعان.
ال ديرەكتور قىزمەتىندەگى ازامات ساتىبالدى شەرۋگە جينالعان جۇرتتىڭ الدىندا ەش تۇسىندىرمە جاساماعان ەدى. ول جاعدايعا قاتىستى جەلىدەگى پاراقشاسىندا جازبا جاريالادى.
"جالعان اقپاراتقا جۇيەلى جاۋاپ. دۇرىس تۇسىنىك بولۋ ءۇشىن، قىسقاشا قايىرايىن. ۇلكەن ماقالا دۇيسەنبى كۇنى شىعادى.
1. "قازاقفيلم" مەن "قازاقانيماتسيا" قىزمەتكەرلەرى ايلىقتارىن تولىق الىپ وتىر.
2. بۇل - "التىن ادام" جوباسىنىڭ شىعارماشىلىق توبى.
ايلىق ەمەس، قالاماقى. (گونورار)
3. جوبا، 2019 جىلى باستالعان. بەس جىل سوزىلىپ بىتپەي كەلە جاتىر.
سوڭعى مەرزىم بويىنشا 2023-تە ءبىتۋ كەرەك ەكەن.
4. 90% اقشاسى تولەنگەن.
5. 10% پايىزى قالعان.
6. بۇل جوبا، ۇلتتىق كينونى قولداۋ ورتالىعىنىڭ تاپسىرىسى.
7. "قازاقفيلم" - ورىنداۋشى ورگان. "قازاقفيلم" دە قاراجاتىن الا الماي، زارداپ شەگىپ وتىر.
8. كينو ورتالىعى جوبانى قابىلدامادى. ول جەردە ەكسپەرتتىك كەڭەس بار.
9. سودان كەيىن، سوت پروتسەسى باستالدى.
10. بۇل - جۇيەلى شارا. ءبارىن زاڭداستىرۋ ءۇشىن.
11. 20-شى ماۋسىم كۇنى، ۇلتتىق كينونى قولداۋ ورتالىعىنىڭ باستىعى قۇرمانبەك مىرزامەن كەزدەسۋ ءوتتى. سول جەردە ورتاق شەشىمگە كەلدى. جوبانىڭ رەجيسسەرى مەن اۆتورلارى، قول الىسىپ كەلىستى.
12. "قازاقفيلم" سول باعىتتا جۇمىسىن باستاپ كەتتى.
بۇل جەردە، جوباعا قاتىسى جوق مەنى جانە "قازاقفيلمدى" كىنالاۋ دۇرىس ەمەس. "قازاقفيلم" دە جابىرلەنۋشى. قالاي بولماسىن، "التىن ادام" جوباسى جارىققا شىعادى. شىعارماشىلىق توپ قالاماقىسىن الادى. سوعان ءسال ۋاقىت جانە سابىر كەرەك.
وسىنى پايدالانىپ، پيعىلى باسقا جانە بۇل جوباعا دىم قاتىسى جوق، وسىنى ۇيىمداستىرعان بەلگىلى ءبىر توپقا ايتارىم......... ابىرويدى بەرەتىن جاراتقان جانە الاتىن دا جاراتقان. اۋرە بولماڭدار", - دەپ جازدى ول.
