باكۋدە ءۇندىستان ۇكىمەتىنىڭ ەتنوستىق ازشىلىقتارعا قاتىستى رەپرەسسيالىق ساياساتىنا ارنالعان «1984 جىلعى ماۋسىم، امريتسار وقيعالارى: گەنوتسيد كونتەكسىندەگى ءۇندىستاننىڭ ەتنوستىق ازشىلىقتارعا قارسى ترانسۇلتتىق قۋعىن-سۇرگىنى» اتتى حالىقارالىق كونفەرەنتسيا باستالدى. بۇل تۋرالى Report اگەنتتىگى جازدى، دەپ حابارلايدى «ادىرنا» ءتىلشىسى.
ءىس-شارانى باكۋ باستاماشىل توبى ۇيىمداستىرعان.
كونفەرەنتسياعا كانادا، ۇلىبريتانيا، نيدەرلاند، گەرمانيا، شۆەيتساريا، اۆستراليا جانە اقش-تاعى سيكح قاۋىمداستىقتارىنىڭ وكىلدەرى، ساراپتامالىق ورتالىقتاردىڭ جەتەكشىلەرى، ادام قۇقىقتارى مەن ەتنوستىق ازشىلىقتار ماسەلەلەرى بويىنشا ساراپشىلار، سونداي-اق ءۇندىستان ۇكىمەتىنىڭ رەپرەسسيالىق، ناسىلشىلدىك سيپاتتاعى جانە قۋدالاۋ ساياساتىنىڭ تىكەلەي قۇرباندارى، سونىڭ ىشىندە داليتتەر قاۋىمىنىڭ وكىلدەرى قاتىسۋدا.
تالقىلاۋلار بارىسىندا ءۇندىستان ۇكىمەتىنىڭ ەتنوستىق جانە ءدىني ازشىلىقتارعا، اسىرەسە سيكحتار مەن داليتتەرگە قارسى جۇرگىزىپ وتىرعان ترانسۇلتتىق رەپرەسسيالارى مەن جۇيەلى قۋدالاۋ ساياساتىن حالىقارالىق ۇيىمداردىڭ كۇن تارتىبىندە ساقتاۋ ماسەلەلەرى قارالادى دەپ كۇتىلۋدە.
سونداي-اق رەپرەسسيادان زارداپ شەككەن دياسپورالىق ۇيىمدار اراسىنداعى ۇيلەستىرىلگەن ىنتىماقتاستىقتى نىعايتۋ، ترانسۇلتتىق قۋدالاۋدان قۇقىقتىق قورعاۋدىڭ بىرلەسكەن تەتىكتەرىن كۇشەيتۋ جانە حالىقارالىق الاڭدارداعى ورتاق ءىس-قيمىلداردى دامىتۋ ماسەلەلەرى بويىنشا پىكىر الماسۋ جوسپارلانعان.
