فوتو: ngmk.uz
وزبەكستاننىڭ ناۆوي تاۋ-كەن مەتاللۋرگيا كومبيناتىنا قاراستى «قىزىلقۇم» كەن باسقارماسىندا قايعىلى وقيعا بولدى. شينومونتاج جۇمىستارى كەزىندە اۆتوكولىك دوڭگەلەگى جارىلىپ، ەكى جۇمىسشى قازا تاپتى، دەپ حابارلايدى “ادىرنا”.
كومبيناتتىڭ ءباسپاسوز قىزمەتىنىڭ مالىمەتىنشە، وقيعا 10 قىركۇيەك كۇنى ساعات 15:00 شاماسىندا «پيستالي» كەن ورنىنداعى №1 كولىك تسەحىنىڭ قولدانىستان شىققان اۆتوكولىك شينالارىن ساقتاۋ الاڭىندا بولعان.
الدىن الا اقپارات بويىنشا، جۇمىسشىلار قۇبىر تاسىمالدايتىن كولىكتىڭ تىركەمەسىندە شينومونتاج جۇمىستارىن جۇرگىزىپ جاتقان كەزدە دوڭگەلەك جارىلعان. وقيعا سالدارىنان ەكى قىزمەتكەر كوز جۇمدى.
قازىر قۇقىق قورعاۋ ورگاندارى وقيعاعا قاتىستى تەرگەۋگە دەيىنگى تەكسەرۋ جۇرگىزىپ جاتىر. سونىمەن قاتار مەملەكەتتىك باقىلاۋشى ورگاندار ارنايى تەرگەۋ باستاپ، جازاتايىم وقيعانىڭ ناقتى سەبەپتەرى مەن ءمان-جايىن انىقتاۋدا.
كومبينات وكىلدەرى بولعان جاعدايعا بايلانىستى قاجەتتى شارالار قابىلدانىپ جاتقانىن جانە مۇنداي وقيعالاردىڭ قايتالانۋىنا جول بەرمەۋ ءۇشىن قاۋىپسىزدىك تالاپتارى قوسىمشا قارالاتىنىن حابارلادى.
