وزبەكستان پرەزيدەنتى شاۆكات ميرزيوەۆ ءبىلىم بەرۋ جۇيەسىن رەفورمالاۋعا ارنالعان كەڭەستە ەلدە قىتاي ءتىلىن تەرەڭدەتىپ وقىتۋ باعدارلاماسى جۇزەگە اسىرىلاتىنىن ايتتى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل ءۇشىن رەسپۋبليكاعا قىتايدان 100 ءتىل مامانى مەن ەرىكتى شاقىرىلادى.
ميرزيوەۆتىڭ ايتۋىنشا، قىتايعا جاساعان ساپارى بارىسىندا ەنەرگەتيكا، گەولوگيا، حيميا، ترانسپورت، اۋىل جانە سۋ شارۋاشىلىعى سالالارى بويىنشا قىتايلىق ءىرى كومپانيالارمەن كەلىسىمدەرگە قول جەتكىزىلگەن. ناتيجەسىندە $35 ملرد كولەمىندە ينۆەستيتسيالىق جوبالار پاكەتى ازىرلەندى. بۇل باستامالاردى ىسكە اسىرۋ ءۇشىن زاماناۋي تەحنولوگيالاردى مەڭگەرگەن ءارى قىتاي ءتىلىن بىلەتىن مىڭداعان مامان قاجەت. وسىعان بايلانىستى ءار وڭىردە ەكى «وزبەك-قىتاي شەبەرحاناسى» اشىلادى.
پرەزيدەنت ءبىلىم سالاسىنداعى جەتىستىكتەردى دە اتاپ ءوتتى. 2025 جىلدىڭ باسىنان بەرى وزبەك وقۋشىلارى حالىقارالىق وليمپيادالاردا 195 مەدال جەڭىپ العان. كەلەسى جىلى رەسپۋبليكادا حيميا جانە ينفورماتيكا پاندەرىنەن حالىقارالىق جارىستار وتەدى. بۇعان قوسا، شەت تىلدەرىن ۇيرەتەتىن مىڭنان استام مەكتەپتە سەرتيفيكات العان بالالاردىڭ سانى ءبىر جىل ىشىندە 2,5 ەسە ارتقان.
سونداي-اق، وزبەكستان وقۋشىلارى ءبىرىنشى سىنىپتان باستاپ ينفورماتيكا وقىپ، جوعارعى سىنىپتاردا جاساندى ينتەللەكت بويىنشا ساباقتار ەنگىزىلمەك. وسى ماقساتتا 2 مىڭ سىنىپ زاماناۋي كومپيۋتەرلەر مەن ينتەراكتيۆتى تاقتالارمەن جابدىقتالادى.
