ۋكراينا ءۇشىن سوعىسىپ جۇرگەن جاسۇلان دۇيسەمبينگە ازاماتتىق بەرۋ تۋرالى ۆلاديمير زەلەنسكيدىڭ اتىنا ونلاين پەتيتسيا جاريالاندى، دەپ جازادى "ادىرنا" ۇلتتىق پورتالى.
"ۋكراينا قارۋلى كۇشتەرىنىڭ قۇرامىندا ۋكراينانى قورعاپ جۇرگەن قازاق جاسۇلان دۇيسەمبينگە ازاماتتىق بەرۋىڭىزدى سۇرايمىن. ول قولىنا قارۋ الىپ، ءبىزدىڭ ەلىمىزدى شابۋىلعا دەيىن دە قورعادى. جاسۇلان 2015 جىلدان بەرى ۋكراينادا تۇرادى. ۋكراينالىق ايەلى جانە ءبىزدىڭ مەملەكەت اۋماعىندا تۋعان ەكى بالاسى بار. ازاماتتىعى جوق بولسا دا، ول 2021 جىلدىڭ كۇزىندە مايدانعا اتتاندى. تالاي شايقاستاردى باستان وتكەردى. نوۆوترويتسك، بۋگاس، ۆولنوۆاحا، ۆلاديميروۆكا ءۇشىن باسىن بايگەگە تىگىپ، شايقاستى. وسى ۋاقىت ارالىعىندا تالاي باتىرلار قازا تاۋىپ، جاسۇلان جارالانىپ، ەمدەلگەننەن كەيىن قايتادان مايدانعا ورالادى. ءىىى دارەجەلى «ەرلىگى ءۇشىن» وردەنىمەن ماراپاتتالعان. جاسۇلان ۋكراينا ازاماتتىعىن العىسى كەلەدى، قازاقستاندا ول جالدامالى، ساياسي سەبەپتەرمەن قۋعىنعا ۇشىرايدى. دونباسستاعى شايقاستاردىڭ بىرىندە ونىڭ تولقۇجاتى ورتەنىپ كەتكەن، مەملەكەتتىك كوشى-قون قىزمەتى وعان ۋكراينا ازاماتتىعىن بەرۋدەن باس تارتىپ وتىر", - دەپ جازدى پەتيتسيا اۆتورى، ۋكراين ءجۋرناليسى سەرگەي پەيچەۆ.
"ادىرنا" ۇلتتىق پورتالى
