ۋكراينا پرەزيدەنتى ۆلاديمير زەلەنسكي كيەۆ ماسكەۋمەن سوعىستى اياقتاۋ تۋرالى تىكەلەي كەلىسسوزدەر جۇرگىزۋگە دايىن ەكەنىن ايتتى. ونىڭ ايتۋىنشا، بۇل اقش پرەزيدەنتى دونالد ترامپتىڭ قاۋىپسىزدىك كەپىلدىكتەرىن ۇسىنعان جاعدايدا مۇمكىن بولادى. بۇل تۋرالى ول Bloomberg اگەنتتىگىنە 22 قاڭتاردا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
«ەگەر پرەزيدەنت ترامپ ۋكرايناعا بۇل كۇشتى جانە قايتارىمسىز قاۋىپسىزدىكتى قامتاماسىز ەتە السا، ءبىز ديپلوماتيالىق جولمەن جۇرە باستايمىز. مەن رەسەيسىز بۇل سوعىستى ديپلوماتيالىق جولمەن اياقتاۋ مۇمكىن ەمەس ەكەنىن تۇسىنەمىن»، – دەدى زەلەنسكي.
ول ۋكراينانىڭ ۇزاق مەرزىمدى قاۋىپسىزدىگىنىڭ كەپىلى - ناتو-عا مۇشە بولۋ نەمەسە اقش-تىڭ قاتىسۋىمەن باتىس بىتىمگەرشىلىك كۇشتەرىنىڭ بولۋى، دەپ ەسەپتەيدى.
زەلەنسكي ۋكرايناداعى سوعىس اياقتالعاننان كەيىن رەسەيدىڭ قايتا قارۋلانۋى مەن جاڭا اسكەري اگرەسسيانىڭ الدىن الۋ قاجەتتىگىن ايتتى. ونىڭ سوزدەرىنە قاراعاندا، ەڭ قاۋىپتى ستسەناري – رەسەي پرەزيدەنتى ۆلاديمير ءپۋتيننىڭ سوعىستى قايتا باستاۋعا مۇمكىندىك بەرەتىن جاعدايى.
«ول ترامپقا كوپ نارسە ۋادە ەتەدى، ءتىپتى ونىمەن كەزدەسۋگە بارار الدىندا دا كوپتەگەن قادامعا بارادى»، – دەپ ەسكەرتتى ول.
سونداي-اق، زەلەنسكي رەسەي اسكەرىنىڭ، كەم دەگەندە، 2022 جىلدىڭ اقپانىندا باستالعان تولىقماسشتابتى باسىپ كىرۋ كەزەڭىنەن بۇرىنعى شەكاراعا دەيىن شەگىنگەن جاعدايدا عانا كەلىسسوزدەردى باستاۋ ءادىل بولاتىنىن ايتتى.
داۆوستا وتكەن دۇنيەجۇزىلىك ەكونوميكالىق فورۋمدا ەكى كۇن بۇرىن زەلەنسكي، رەسەيمەن اسكەري قاقتىعىستى رەتتەۋ اياسىندا ۋكرايناعا كەم دەگەندە 200 مىڭ ەۋروپالىق بىتىمگەرلەر كونتينگەنتىن جىبەرۋ قاجەتتىگىن ايتتى.
بۇعان دەيىن زەلەنسكي رەسەيدى اسكەري اگرەسسيانى توقتاتۋعا ماجبۇرلەۋ ءۇشىن ءوز «جەڭىس جوسپارىن» ورىنداۋدى تالاپ ەتكەن بولاتىن. باق مالىمەتتەرىنە قاراعاندا، بۇل جوسپار ۋكرايناعا ناتو مۇشەلەرى ءۇشىن قاراستىرىلعانداي باتىس قاۋىپسىزدىك كەپىلدىكتەرىن بەرۋ، سونداي-اق كيەۆكە جاڭا اسكەري جانە قارجىلىق كومەك پاكەتتەرىن ءبولۋدى تالاپ ەتەدى.
ءوز كەزەگىندە كرەمل ۋكراينا قارۋلى كۇشتەرىنىڭ لۋگانسك، دونەتسك، زاپوروجە جانە حەرسون وبلىستارىنىڭ باسىپ الىنباعان بولىكتەرىنەن شىعۋىن، قىرىمدى رەسەي قۇرامىنا قوسىلعانىن مويىنداۋدى، ۋكرايناعا ناتو-عا كىرۋگە تىيىم سالۋدى، ونىڭ يادرولىق ەمەس مارتەبەسىن راستاپ، رەسەيگە قارسى بارلىق سانكتسيالاردى الىپ تاستاۋدى تالاپ ەتەدى.
