2024 جىلدىڭ ءبىرىنشى قاڭتارىنان باستاپ 17 جاستاعى بالالاردى اسكەري ەسەپكە قويۋ اۆتوماتتى تۇردە جۇرگىزىلەدى. بۇل تۋرالى قورعانىس مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مينيسترلىك پرەزيدەنتتىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالارى تۋرالى» جارلىعىنىڭ ەرەجەلەرىن دايەكتى تۇردە ىسكە اسىرادى. باستامانى پرەمەر-مينيستر، مۇددەلى مەملەكەتتىك ورگاندار، استانا، رەسپۋبليكالىق ماڭىزى بار قالالار مەن وبلىستاردىڭ اكىمدىكتەرى قولدادى. ونى ىسكە اسىرۋ مەملەكەتتىك ورگانداردىڭ اقپاراتتىق جۇيەلەرىن موديفيكاتسيالاۋ مەن ىقپالداستىرۋدىڭ ارقاسىندا مۇمكىن بولدى. بۇل ەلىمىزدىڭ 16-60 جاس ارالىعىنداعى ازاماتتارىن اسكەري ەسەپكە الۋدىڭ تولىق قامتىلىپ جۇرگىزىلۋىنە مۇمكىندىك بەردى»،—دەلىنگەن حابارلامادا.
قولدانىستاعى زاڭعا سايكەس جىل سايىن ون جەتى جاسقا تولاتىن ەر ازاماتتاردى تىركەۋ جۇرگىزىلەدى. باسقارمانىڭ ايتۋىنشا، مۇنداي پروتسەدۋرا اسكەري قىزمەتكە جارامدىلىق دەڭگەيىن انىقتاي الادى.
«جىل سايىن 120 مىڭعا جۋىق 17 جاسار بالا اسكەري ەسەپكە الىنادى. قىزمەتتى اۆتوماتتاندىرۋ شاقىرۋ ۋچاسكەلەرىنە تىركەۋدى ۇيىمداستىرۋ جانە جۇرگىزۋ ءۇشىن جەرگىلىكتى اتقارۋشى ورگاندارعا جىل سايىن بولىنەتىن ميلليارد تەڭگەدەن اسا بيۋدجەت قاراجاتىن ۇنەمدەۋگە مۇمكىندىك بەرەدى. ال ۇنەمدەلگەن قاراجات مەديتسينالىق كوميسسيا مۇشەلەرىنە ەڭبەكاقى تولەۋ، شالعايداعى اۋىلدىق وكرۋگتەردەن جاستاردى اسكەري كوميسسارياتتارعا الدىرۋ، كەڭسە تاۋارلارى جانە ت. ب. قىزمەتتەرگە جۇمسالاتىن بولادى»،—دەپ تولىقتىردى مينيسترلىك.
