شاحماتتان الەم چەمپيونى ماگنۋس كارلسەن الماتىعا كەلدى. بۇل تۋرالى قازاقستاننىڭ شاحمات فەدەراتسياسى مالىمدەدى، دەپ حابارلايدى “ادىرنا” ۇلتتىق پورتالى.
اۋەجايدا ونى جاس جانكۇيەر – شاحماتشى ديلايلا سادۋاقاسوۆا كۇتىپ العان. ديلايلا بليتس بويىنشا قازاقستان رەسپۋبليكاسىنىڭ چەمپيونى، 2019 جىلعى كارپوۆا كۋبوگىنىڭ يەگەرى، حالىقارالىق شاحمات فەدەراتسياسىنىڭ FIDE سىيلىعىنىڭ يەگەرى. مۇنىمەن قوسا ول الەم چەمپيوندارى تۋرالى اڭگىمەلەيتىن "ديلايلامەن شاحمات حيكايالارى" اتتى بىرەگەي مادەني-اعارتۋشىلىق جوباسىن جاساعانى ءۇشىن ماراپاتتالعان. قوناقتى قارسى الۋعا كەلگەن ايەلدەر اراسىندا ديلايلا جالعىز بالا. ايتا كەتسەك، FIDE 2022 جىلدى شاحماتتاعى ايەلدەر جىلى دەپ جاريالاعان بولاتىن.
"مەن ماگنۋس كارلسەننىڭ مانسابىنا قايران قالامىن جانە ونىڭ چەمپيون رەتىندە قالىپتاسۋىنا اكەسى ۇلكەن ءرول اتقاردى دەپ ويلايمىن. مەنى دە وتباسىم ۇنەمى قولدايدى، ولاردىڭ قولداۋىنسىز جەتىستىككە جەتپەس ەدىم. مەن ماگنۋستان عانا ەمەس، ونىڭ اكەسىنەن دە قولتاڭبا الدىم", - دەيدى توعىز جاسار ديلايلا.
ايتا كەتەيىك، شاحماتتان الەم چەمپيوناتى الماتىدا 2022 جىلدىڭ 25-30 جەلتوقسانىندا وتەدى. الەمنىڭ 50 ەلىنىڭ جەتەكشى شاحماتشىلارى تيتۋلدار ءۇشىن تالاسادى. ءتۋرنيردى ۇيىمداستىرۋشىلار – FIDE مەن قازاقستان شاحمات فەدەراتسياسى. تۋرنير بالۋان شولاق اتىنداعى سپورت جانە مادەنيەت سارايىندا وتەدى. چەمپيونات الماتى قالاسى اكىمدىگىنىڭ جانە قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن وتكىزىلمەك. جۇلدە قورى – 1 ميلليون دوللار.
