الماتى پوليتسياسى ءال-فارابي داڭعىلى مەن مەڭدىقۇلوۆ كوشەسىنىڭ قيىلىسىندا بولعان جانتۇرشىگەرلىك جول اپاتىنا قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
قايعىلى وقيعا سالدارىنان ءۇش ادام قازا تاپقان. پوليتسيا مالىمەتىنشە، اپاتقا قاتىسى بار Zeekr كولىگىنىڭ جۇرگىزۋشىسى قازىرگى تاڭدا مەديتسينالىق مەكەمەدە كۇزەت باقىلاۋىندا ەم الىپ جاتىر. ونىڭ جاعدايى تۇراقتالعان سوڭ، ۋاقىتشا ۇستاۋ يزولياتورىنا جەتكىزىلمەك.
اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 345-بابى، 4-بولىگىمەن قىلمىستىق ءىس قوزعالدى. بۇل باپ ەڭ قاتاڭ جاعدايدا 10 جىلعا دەيىن باس بوستاندىعىنان ايىرۋ جازاسىن قاراستىرادى.
الماتى قالالىق پوليتسيا دەپارتامەنتى باستىعىنىڭ ورىنباسارى رۇستەم شارىباەۆ وقيعاعا قاتىسى بار بارلىق تۇلعالار انىقتالعانىن مالىمدەدى.
«وقيعاعا قاتىسقان جانە ونىڭ قاتىسى بار بارلىق تۇلعالار انىقتالدى. ارقايسىسىنا اكىمشىلىك ءىس قوزعالدى، ماتەريالدار سوتقا جولداندى، كولىكتەر ايىپ تۇراعىنا قويىلدى. ەشكىم جاۋاپكەرشىلىكتەن قاشا المايدى»، – دەدى ول.
پوليتسيا قىزمەتكەرلەرى بارلىق بەينەباقىلاۋ كامەرالارىنىڭ جازبالارىن، سونىڭ ىشىندە جەكە كامەرالارداعى بەينەماتەريالداردى جيناپ، ءىس ماتەريالدارىنا تىركەگەن. قازىرگى ۋاقىتتا ولار جان-جاقتى زەرتتەلىپ جاتىر.
