ماڭعىستاۋ وبلىسى، اقتاۋ قالاسىنان 20 شاقىرىم جەردەگى قاراكول ايدىنىنا قونعان اققۋلار جاپپاي قىرىلىپ جاتىر. قازاق ءۇشىن كيەلى قۇستى زەرتتەۋ بارىسىندا ولاردان قۇس تۇماۋىنىڭ بەلگىلەرى انىقتالدى. وڭىرگە شۇعىل تۇردە ۆاكتسينا جولداندى، دەپ حابارلايدى "ادىرنا" ۇلتتىق پورتالى حابارلادى.
اققۋلارعا سىنامالاردى "ۆەتەريناريا جونىندەگى ۇلتتىق رەفەرەنتتىك ورتالىق" رمك جۇرگىزدى.
قر اشم ۆەتەريناريالىق باقىلاۋ جانە قاداعالاۋ كوميتەتى رەسپۋبليكالىق قوردان ماڭعىستاۋداعى بارلىق ءۇي قۇستارىن ۆاكتسيناتسيالاۋ ءۇشىن 18 644 دوزا ۆاكتسينا بولىنگەنىن حابارلادى. سونداي-اق وڭىردە رەسپۋبليكالىق ەپيزووتياعا قارسى وتريادتىڭ ماماندارى جۇمىس اتقارىپ جاتىر.
"جەرگىلىكتى اتقارۋشى ورگاندار جوعارى پاتوگەندى قۇس تۇماۋى بويىنشا تۇراقتى ەپيزووتيالىق جاعدايدى ساقتاۋ ماقساتىندا شارۋاشىلىق جۇرگىزۋشى سۋبەكتىلەر، ۆەتەريناريالىق دارىگەرلەر، اڭشىلار، قورىقشىلار، تۇرعىندار جانە باسقا دا مۇددەلى تۇلعالاردىڭ (قۇستارى بار) اراسىندا ءتۇسىندىرۋ جۇمىستارىن جۇرگىزەدى", - دەدى قر اشم ۆەتەريناريالىق باقىلاۋ جانە قاداعالاۋ كوميتەتى.
قۇس فابريكالارى بولسا، جابايى جانە سينانتروپتى قۇستاردىڭ جەم-سۋ قويمالارى مەن قۇستاردى ۇستايتىن عيماراتتارعا جاقىنداۋىنا جول بەرمەۋ ءۇشىن ۆەتەريناريالىق ءىس-شارالاردى كۇشەيتەدى.
سونداي-اق، ماماندار قازىر ءۇي قۇستارىنىڭ تۇماۋعا شالدىقپاعانىن، قۇس تۇماۋى بويىنشا ەپيزووتيالىق جاعداي تۇراقتى ەكەنىن مالىمدەدى.
"ادىرنا" ۇلتتىق پورتالى
