«ماڭعىستاۋ وبلىسى اكىمدىگىنىڭ ءىس باسقارماسى» كوممۋنالدىق مەملەكەتتىك مەكەمەسى جىل باسىندا دارەتحانا قاعازىنا ارناپ 7 024 609 تەڭگە قارجى بولگەن، - دەپ حابارلايدى ادىرنا ۇلتتىق پورتالى goszakup.gov.kz سايتىنا سىلتەمە جاساپ.
تەندەردىڭ جەڭىمپازى 2023 جىلدىڭ 19 قاڭتارىندا انىقتالعان. اكىمدىك قىزمەتكەرلەرىنىڭ تابيعي اجەتىنە ارنالىپ بيۋدجەتتەن بولىنگەن 7 024 609 تەڭگەگە 11 570 دانا دارەتحانا قاعازى ساتىپ الىنعان. ءار دارەتحانا قاعازىنىڭ قۇنى – 607 تەڭگەنى قۇرايدى.
607 تەڭگە تۇراتىن دارەتحانا قاعازىنىڭ ءار داناسىندا 12 ورام بولۋى مىندەتتى. ونىمەن قوسا، اقتاۋلىق شەندىلەر 2 قاباتتى، 100 پايىز تسەلليۋزا ماتەريالىنان جاسالعان، ەنى 12 سانتيمەترلىك، ورام ۇزىندىعى 150 مەتر، ءتۇسى اق قاعازداردى عانا پايدالانادى ەكەن.
تەحنيكالىق سيپاتتامادا تەندەر جەڭىمپازى ءار 30 كۇن سايىن 1157 دانا ء(ار دانادا 12 ورام) دارەتحانا قاعازىن جەتكىزىپ تۇرۋعا مىندەتتەلگەن. دەمەك، ماڭعىستاۋ وبلىسىنىڭ اكىمدىگى ايىنا 13 884, كۇنىنە 694 ورام قاعازدى (20 جۇمىس كۇنىن ەسەپتەپ وتىرمىز) كادەگە جاراتادى-مىس. ءار ورامنىڭ ۇزىندىعى 150 مەتر دەپ ەسەپتەسەك، وبلىس اكىمدىگىنىڭ قىزمەتكەرلەرىنە كۇنىنە حالىقتىڭ قالتاسىنان جينالعان اقشاعا 104 100 مەتر دارەتحانا قاعازىن ساتىپ اپەرىپ بەرىپ وتىرمىز دەگەن ءسوز.
ءبىزدى بىرەر سۇراق مازالايدى. اكىمدىكتە قىزمەت ىستەيتىن شەنەۋنىكتەر كۇنىگە 104 100 مەترلىك اجەتحانا قاعازىن پايدالانۋ ءۇشىن قانشا رەت دارەتحاناعا بارىپ، قانشا رەت ۇلكەن دارەتكە وتىرۋى كەرەك؟ كۇنىگە 694 ورام قاعاز قوياتىنداي ءبىر عانا اكىمدىكتە 694 دارەتحانا بار ما؟ ماڭعىستاۋ وبلىسىنىڭ اكىمدىگىندە ءىشى ۇستامايتىن مەمقىزمەتكەرلەر عانا جۇمىس ىستەيتىن بولعانى ما؟ جوق الدە، دارەتحانا قاعازى دەگەن اقشا قىمقىرۋدىڭ توتە جولى ما؟
ءسىز نە دەيسىز؟
قانات بىرلىكۇلى
«ادىرنا» ۇلتتىق پورتالى
