سانالى ۇرپاق – بولاشاق نەگىزى. «ۇلاعاتتى ۇرپاق تاربيەلەۋ – اسا جاۋاپتى ءارى كۇردەلى مىندەت»، – دەيدى مەملەكەت باسشىسى قاسىم-جومارت توقاەۆ. بۇل ماڭىزدى باعىت بويىنشا رينات زايتوۆتىڭ باسشىلىعىنداعى «الاتاۋ» ءداستۇرلى ونەر تەاترى دا قۇر الاقان ەمەس. تەاتر ءبىرشاما مەكتەپ، بالاباقشالارمەن مادەني بايلانىستار ورناتتى. بالالار جىلى اياسىندا 2022-ءنى نۇرجان تۋتوۆتىڭ رەجيسسەرلىگىندەگى بالالاردىڭ جاقسىلىق پەن جاماندىق، ادىلدىك تۋرالى كوزقاراستارىن قالىپتاستىرۋ، قاجەتتى ادامدىق ساپالاردى كورسەتۋدى ماقسات ەتكەن «اگۋگاي مەن يگيگاي» اتتى حالىق ەرتەگىلەرى مەن ءداستۇرلى اندەردەن قۇرالعان بالالارعا ارنالعان مۋزىكالىق قويىلىمنىڭ پرەمەراسىمەن باستادى. وسى ۋاقىتقا دەيىن 22 رەت قويىلدى. سولاردىڭ ىشىندە كورەرمەندەردىڭ سۇراۋى بويىنشا ساحنالانعاندارى دا بار. مۇمكىندىگى شەكتەۋلى جانە جەتىم بالالار، سونداي-اق ۇزدىك وقۋشىلارعا تەگىن كورسەتىلۋ كۇندەرى دە ۇيىمداستىرىلعان بولاتىن. ال جىل سوڭىندا، ياعني جەلتوقسان ايىنىڭ 23, 28, 29, 30 كۇندەرى تابيعات قامقورشىلارىنىڭ قاتارىن مولايتۋعا باعىتتالعان «گۇلدەر حيكاياسى» (اۆتورى – نۇرجان تۋتوۆ، رەجيسسەرى – جۇلدىزبەك جۇمانباي) مۋزىكالىق ەرتەگىسىنىڭ پرەمەراسى وتەدى. نۇرجان تۋتوۆ قويىلىمنىڭ ماقساتىن بىلاي دەپ جەتكىزەدى: «بۇل – گۇلدەر الەمىنە ارنالعان مۋزىكالىق ەرتەگى-فانتازيا. تابيعاتتاعى سان الۋان گۇلدەرگە قاتىستى قىزىقتى ماحاببات حيكاياسى بويىنشا جاستار مەن جاسوسپىرىمدەردىڭ گۇلدەرگە دەگەن سەزىمدىك قاتىناستارىن تاربيەلەۋدى، سول ارقىلى اسەم تابيعاتتى قورعاۋ مادەنيەتىن قالىپتاستىرۋدى نەگىزگە الدىق».
تەاتر ديرەكتورى، بەلگىلى ايتىسكەر اقىن رينات زايتوۆ تەاتر ۇستانىمىنا بايلانىستى «بالالار جىلى اياسىندا ءبىزدىڭ «الاتاۋ» تەاترى از جۇمىس اتقارعان جوق. اتاپ ايتاتىنى، جىلدىڭ باسىن «اگۋگاي مەن يگيگاي» ەرتەگىسىنىڭ پرەمەراسىمەن باستادىق. جىل سوڭىندا دا بالالارعا ارنالعان ەرەكشە ۇلگىدەگى، بۇرىن-سوندى بولماعان ساحنالىق بەزەندىرىلۋدەگى «گۇلدەر حيكاياسى» دەگەن ەرتەگىنىڭ پرەمەراسىمەن اياقتاعالى وتىرمىز. ياعني جىل بويى ارنايى تۇردە بالالارعا باعىتتالعان شارالار ۇزدىكسىز جۇرگىزىلىپ وتىردى. ءبىرشاما مەكتەپتەرمەن مەموراندۋم جاساستىق. مەكتەپتەردە كەزدەسۋلەر وتكىزدىك. بيىل احمەت جۇبانوۆ اتىنداعى رەسپۋبليكالىق مامانداندىرىلعان مەكتەپ-ينتەرناتىنىڭ ەسەپ بەرۋ كونتسەرتى بىزدە ءوتتى. بۇل دا مەكتەپ جاسىنداعى بالالاردى ونەرگە باۋلۋ، ساحناعا ۇيرەتۋ، ولاردى وسى جولدا تاربيەلەۋ ماقساتىنداعى جۇمىستار. اباي اتىنداعى رەسپۋبليكالىق مامانداندىرىلعان مەكتەپ-ينتەرناتىمەن بىرلەسىپ، قانشاما رەسپۋبليكالىق، قالالىق ايتىستار وتكىزدىك. تەك بالالار جىلىندا عانا ەمەس، باسقا ۋاقىتتا دا ۇرپاق تاربيەسىنە ۇلكەن ءمان بەرىپ، قايىرىمدىلىق شارالارى بولسىن، كينو بولسىن، بالالارعا باعىتتالعان نارسەلەردى ەش ءمۇلت جىبەرمەۋگە تىرىسامىز. ويتكەنى بالا ءبىزدىڭ بولاشاعىمىز. بيىلعى گاسترولدىك ساپاردىڭ وزىندە دە ءبىز مىندەتتەپ، «اگۋگاي مەن يگيگايدى» اپاردىق. قاي جەرگە بارساق تا، كورەرمەندەرى باسقا قويىلىمدارعا قارعاندا كوبىرەك بولدى. تەاتر بالا تاربيەسىنە قاتىسىپ جاتىر»، – دەيدى.
ەلىمىزدىڭ ەرتەڭى جارقىن بولعاي!
قۋانىش جۇمابەكۇلى
«الاتاۋ» ءداستۇرلى ونەر تەاترى ادەبيەت ءبولىمىنىڭ مەڭگەرۋشىسى
