Sanaly urpaq – bolashaq negizi. «Ulaǵatty urpaq tárbıeleý – asa jaýapty ári kúrdeli mindet», – deıdi Memleket basshysy Qasym-Jomart Toqaev. Bul mańyzdy baǵyt boıynsha Rınat Zaıtovtyń basshylyǵyndaǵy «Alataý» dástúrli óner teatry da qur alaqan emes. Teatr birshama mektep, balabaqshalarmen mádenı baılanystar ornatty. Balalar jyly aıasynda 2022-ni Nurjan Týtovtyń rejısserligindegi balalardyń jaqsylyq pen jamandyq, ádildik týraly kózqarastaryn qalyptastyrý, qajetti adamdyq sapalardy kórsetýdi maqsat etken «Ágýgaı men Igıgaı» atty halyq ertegileri men dástúrli ánderden quralǵan balalarǵa arnalǵan mýzykalyq qoıylymnyń premerasymen bastady. Osy ýaqytqa deıin 22 ret qoıyldy. Solardyń ishinde kórermenderdiń suraýy boıynsha sahnalanǵandary da bar. Múmkindigi shekteýli jáne jetim balalar, sondaı-aq úzdik oqýshylarǵa tegin kórsetilý kúnderi de uıymdastyrylǵan bolatyn. Al jyl sońynda, ıaǵnı jeltoqsan aıynyń 23, 28, 29, 30 kúnderi tabıǵat qamqorshylarynyń qataryn molaıtýǵa baǵyttalǵan «Gúlder hıkaıasy» (avtory – Nurjan Týtov, rejısseri – Juldyzbek Jumanbaı) mýzykalyq ertegisiniń premerasy ótedi. Nurjan Týtov qoıylymnyń maqsatyn bylaı dep jetkizedi: «Bul – gúlder álemine arnalǵan mýzykalyq ertegi-fantazııa. Tabıǵattaǵy san alýan gúlderge qatysty qyzyqty mahabbat hıkaıasy boıynsha jastar men jasóspirimderdiń gúlderge degen sezimdik qatynastaryn tárbıeleýdi, sol arqyly ásem tabıǵatty qorǵaý mádenıetin qalyptastyrýdy negizge aldyq».
Teatr dırektory, belgili aıtysker aqyn Rınat Zaıtov Teatr ustanymyna baılanysty «Balalar jyly aıasynda Bizdiń «Alataý» teatry az jumys atqarǵan joq. Atap aıtatyny, jyldyń basyn «Ágýgaı men Igıgaı» ertegisiniń premerasymen bastadyq. Jyl sońynda da balalarǵa arnalǵan erekshe úlgidegi, buryn-sondy bolmaǵan sahnalyq bezendirilýdegi «Gúlder hıkaıasy» degen erteginiń premerasymen aıaqtaǵaly otyrmyz. Iaǵnı jyl boıy arnaıy túrde balalarǵa baǵyttalǵan sharalar úzdiksiz júrgizilip otyrdy. Birshama mekteptermen memorandým jasastyq. Mektepterde kezdesýler ótkizdik. Bıyl Ahmet Jubanov atyndaǵy respýblıkalyq mamandandyrylǵan mektep-ınternatynyń esep berý konerti bizde ótti. Bul da mektep jasyndaǵy balalardy ónerge baýlý, sahnaǵa úıretý, olardy osy jolda tárbıeleý maqsatyndaǵy jumystar. Abaı atyndaǵy respýblıkalyq mamandandyrylǵan mektep-ınternatymen birlesip, qanshama respýblıkalyq, qalalyq aıtystar ótkizdik. Tek balalar jylynda ǵana emes, basqa ýaqytta da urpaq tárbıesine úlken mán berip, qaıyrymdylyq sharalary bolsyn, kıno bolsyn, balalarǵa baǵyttalǵan nárselerdi esh múlt jibermeýge tyrysamyz. Óıtkeni bala bizdiń bolashaǵymyz. Bıylǵy gastróldik sapardyń ózinde de biz mindettep, «Ágýgaı men Igıgaıdy» apardyq. Qaı jerge barsaq ta, kórermenderi basqa qoıylymdarǵa qarǵanda kóbirek boldy. Teatr bala tárbıesine qatysyp jatyr», – deıdi.
Elimizdiń erteńi jarqyn bolǵaı!
Qýanysh Jumabekuly
«Alataý» dástúrli óner teatry Ádebıet bóliminiń meńgerýshisi
