تۇركيادا ساياساتكەر، قازىرگى بيلىككە نارازى قوعام قايراتكەرى ءارى ىستامبۇل قالاسىنىڭ اكىمى ەكرەم يمامۇلىنىڭ جاقتاستارى [رەسپۋبليكالىق حالىق پارتياسى وكىلدەرى] شەرۋگە شىقتى. ولار ساراچحانە اۋدانىندا جينالىپ، ەكرەم يمامۇلىن سوتتاۋعا قارسى نارازىلىق ءبىلدىرىپ جاتىر. قالا اكىمىنىڭ الداعى ۋاقىتتا ورنىندا قالىپ، نە قىزمەتتەن شەتتەتىلەتىنى ازىرگە بەلگىسىز. ساياسي جاعداي تۋرالى "ادىرنا" ۇلتتىق پورتالى حابارلايدى.
وپپوزيتسيانىڭ بەلدى وكىلى ەكرەم يمامۇلىنىڭ رەسپۋبليكالىق حالىق پارتياسىنداعى سەرىكتەستەرى بۇل نەگىزسىز سوت ءىسىن كەلەسى جىلعى تۇركيادا وتەتىن جالپى سايلاۋمەن بايلانىستىرادى. ولار پرەزيدەنت رەجەپ تايىپ ەردوعاننىڭ وسىلايشا وپپوزيتسيانى السىرەتىپ، ەڭ تانىمال ساياساتكەرلەردىڭ بىرىنەن قۇتىلۋعا تىرىستى دەپ الاڭداپ وتىر.
ساياساتكەردىڭ ءوزى، ەكرەم يمامۇلىنىڭ پىكىرىنشە، وعان قارسى ءجۇرىپ جاتقان سوت ءۇردىسى تۇركيانىڭ ويلاپ تاپقان ايلاسى عانا.
ساياساتكەر وزىنە قاتىستى ۇكىم شىققاننان كەيىن مىنانداي پىكىر ءبىلدىردى:
"اينالدىرعان بىرنەشە ادام حالىق سايلاۋعا ۇسىنعان وكىلدەردى تىزىمنەن الىپ تاستاي المايدى. اللانىڭ قولداۋىمەن ءبىز ءالى كۇرەسىمىز، بۇل قارسىلىق ۇلى كۇرەسكە ۇلاسادى", - دەدى ساياساتكەر.
وقىرماندارعا تۇسىندىرە كەتەيىك، بۇگىن ىستامبۇل سوتى ىستامبۇل قالاسىنىڭ اكىمى ەكرەم يمامۇلىن سوتتادى. ونىڭ ۇستىنەن تۇركيانىڭ سايلاۋ كوميسسياسى مۇشەلەرىن قورلادى دەگەن ايىپپەن ءىس قوزعاپ، 2 جىل 7 اي 15 كۇنگە باس بوستاندىعىنان ايىرۋ تۋرالى ۇكىم شىعاردى.
"ادىرنا" ۇلتتىق پورتالى
