20 قاراشا سايلاۋ كۇنى جاپپاي تارتىپسىزدىك ۇيىمداستىرماقشى بولعان قىلمىستىق توپ ۇستالدى. بۇل تۋرالى ۇلتتىق قاۋىپسىزدىك كوميتەتىنىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
ۆەدومستۆونىڭ حابارلاۋىنشا، ارنايى وپەراتسيا ناتيجەسىندە 7 ادام ۇستالدى.
"قر قىلمىستىق كودەكسىنىڭ 179-بابىنىڭ 2-بولىگى جانە 272-بابىنىڭ 1-بولىگى بويىنشا تەرگەۋ باستالدى. ۇستالعانداردىڭ تۇرعىلىقتى جەرى بويىنشا زاتتاي دالەلدەمەلەر تاركىلەندى. پروكۋراتۋرا سانكتسياسىمەن ولاردىڭ جاپپاي تارتىپسىزدىكتەر ۇيىمداستىرۋعا، مەملەكەتتىك جانە قۇقىق قورعاۋ ورگاندارىنىڭ اكىمشىلىك عيماراتتارىنا، تىرشىلىكتى قامتاماسىز ەتۋ وبەكتىلەرىنە قارۋ مەن تۇتاندىرعىش قوسپالاردى قولدانۋ ارقىلى شابۋىل جاساۋعا دايىندالعاندارى قۇجاتتالعان. توپتىڭ ءاربىر مۇشەسىنىڭ ءرولى ناقتى بولىنگەن، قىلمىستىق جوسپارلار جاسىرىن شارالارىن ساقتاي وتىرىپ، تۇراقتى كەزدەسۋلەر بارىسىندا تالقىلاندى", - دەلىنگەن رەسمي حابارلامادا.
توپ مۇشەلەرى «بوتەلكە لاقتىرعىش» دەپ اتالاتىن جابدىقتار جاساپ، ولاردىڭ كومەگىمەن «مولوتوۆ كوكتەيلدەرىن» لاقتىرا وتىرىپ قۇقىق قورعاۋ ورگاندارى قىزمەتكەرلەرىن فيزيكالىق جويۋدى جوسپارلاعان.
جاسىرىن ورىندار ۇيىمداستىرىپ، وعان قىلمىس جاساۋعا ارنالعان قۇرالدار – كالاشنيكوۆ اۆتوماتى، ويىق ۇڭعىلى «مەركەل» مىلتىعى، ەكى تەگىس ۇڭعىلى كەسىلگەن مىلتىق، وق-دارىلەر، «مولوتوۆ كوكتەيلدەرىنە» ارنالعان سۇيىقتىقتىعى بوتەلكەلەر، «بوتەلكە لاقتىرعىشتار»، بەنزين قۇيىلعان كانيسترالار، راتسيالار ساقتاعان. كۇدىكتىلەر قر قپق 128-بابىنا سايكەس ۇستالىپ، ۋاقىتشا ۇستاۋ يزولياتورىنا قامالدى.
وزگە مالىمەتتەر قازاقستان رەسپۋبليكاسى قپق 201-بابىنا سايكەس جاريالاۋعا جاتپايدى.
"ادىرنا" ۇلتتىق پورتالى
