تۇركيا ۋكراينادا تەز ارادا اتىستى توقتاتۋدى جاقتايدى. بۇل تۋرالى بەيسەنبى، 2 قاڭتاردا تۇركيا سىرتقى ىستەر ءمينيسترى حاكان فيدان بەلگيالىق ارىپتەسى بەرنارد كۆەنتينمەن بىرلەسكەن ءباسپاسوز ءماسليحاتىندا مالىمدەدى، دەپ حابارلايدى “ادىرنا” ۇلتتىق پورتالى.
«ءححى عاسىردا ەۋروپانىڭ ورتالىعىندا جۇزدەگەن مىڭ ادامنىڭ ءومىرىن قيعان، تۇتاس ءبىر ەلدى جويعان سوعىس جانە وسى سوعىستان تۋىنداعان كوشى-قون، ەكونوميكالىق جانە باسقا دا داعدارىستار مۇمكىندىگىنشە تەزىرەك اياقتالۋى كەرەك»، - دەپ كەلتىرەدى فيدان Hurriyet گازەتىنىڭ سايتىندا.
تۇركيانىڭ سىرتقى ىستەر ءمينيسترىنىڭ ايتۋىنشا، كۆەنتينمەن كەزدەسۋ بارىسىندا ولار ەۋروپادا جانە بۇكىل الەمدە سوعىستىڭ اياقتالۋى تۋرالى ءوز پىكىرلەرىن ءبىلدىرىپ، وسى ماسەلە بويىنشا ويلارىمەن بولىسكەن.
قاراشا ايىندا فيدان رەسەي-ۋكراينا سوعىسىن ءادىل شەشۋ ءۇشىن ۋكراينانىڭ اۋماقتىق تۇتاستىعىن ساقتاۋدى تالاپ ەتكەن بولاتىن جانە انكارا ماسكەۋ مەن كيەۆتىڭ ۇستانىمدارى اراسىندا ورتاق شەشىم تابۋعا تىرىساتىنىن مالىمدەگەن.
ءباسپاسوز ءماسليحاتىندا حاكان فيدان سيريا ماسەلەسىن دە قوزعادى.
«50 جىلعا سوزىلعان اساد رەجيمىنىڭ، ياعني زۇلىمدىق رەجيمىنىڭ اياقتالۋى - سيريا حالقى مەن ءبىزدىڭ ايماق ءۇشىن ۇلكەن باقىت»، - دەدى تۇرىك ءمينيسترى.
ول حالىقارالىق قاۋىمداستىقتى سيريا حالقىنا كومەكتەسۋگە شاقىرىپ، سيريالىقتاردىڭ «ءوز بولاشاعىن مۇمكىندىگىنشە تەزىرەك قۇراتىنىنا» سەنىم ءبىلدىردى.
