مونوپوليستەردىڭ مەنشىگىندەگى 26 كومپانيا مەملەكەتكە قايتارىلادى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ ءمالىم ەتتى، دەپ حابارلايدى “ادىرنا” ءتىلشىسى.
ءمينيستردىڭ ايتۋىنشا، ەلىمىزدە ەكونوميكانى مونوپوليادان ارىلتۋ جونىندە ارنايى كوميسسيا قۇرىلدى جانە جۇمىس ىستەپ تۇر.
قازىردىڭ وزىندە كوميسسيانىڭ 25 وتىرىسى وتكىزىلدى. قورىتىندىسى بويىنشا بۇرىن جەكەشەلەندىرىلگەن جانە باسەكەلەس ورتاعا بەرىلگەن نىسانالاردىڭ ىشىنەن مەملەكەت مەنشىگىنە بەرۋ ءۇشىن ولاردى ىرىكتەۋ ولشەمشارتتارى ازىرلەندى.
تەلەكوممۋنيكاتسيا، تەمىرجول ينفراقۇرىلىمى، ەكولوگيا جانە قوناق ءۇي بيزنەسى سالالارىندا اكتسيونەرلىك قوعامدار مەن جاۋاپكەرشىلىگى شەكتەۋلى سەرىكتەستىكتەردەگى اكتسيالار پاكەتى مەن قاتىسۋ ۇلەستەرى، جىلجىمايتىن مۇلىك نىساندارى جانە اقشالاي قاراجات مەملەكەت مەنشىگىنە قابىلداندى.
“مۇلىك مەملەكەتتىك مەنشىككە سىيعا تارتۋ تارتىبىمەن – بيۋدجەتتەن قارجىلىق شىعىنسىز قابىلدانادى. كولىك جانە تەمىرجول ينفراقۇرىلىمى سالاسىنداعى تاعى 26 كومپانيانى مەملەكەتتىك مەنشىككە بەرۋ پروتسەسىندە. بۇل باعىتتاعى جۇمىس كۇشەيتىلەتىن بولادى”، - دەدى مينيستر.
