«استانا» حالىقارالىق قارجى ورتالىعىندا (احقو) جاڭا IT-كومپانيا جۇمىسىن باستادى. كومپانيانىڭ ديرەكتورى جانە باس اتقارۋشى ديرەكتورى قىزمەتىنە الماتىنىڭ بۇرىنعى اكىمى ەربولات دوساەۆتىڭ ۇلى نۇرلان اسقاربەكوۆ تاعايىندالعان، دەپ حابارلايدى “ادىرنا” ۇلتتىق پورتالى Tizgin.kz سايتىنا سىلتەمە جاساپ.
احقو-نىڭ قارجى قىزمەتتەرىن رەتتەۋ كوميتەتى (AFSA) جاريالاعان دەرەككە سايكەس، اتالعان كومپانيا 2026 جىلعى 2 قازاندا جەكە تىركەلگەن. قازىر ونىڭ مارتەبەسى – بەلسەندى. زاڭدى مەكەنجايى استانانىڭ ەسىل اۋدانىنداعى ماڭگىلىك ەل داڭعىلى، 55/20 مەكەنجايىندا ورنالاسقان.
رەسمي تىزىلىمدە نۇرلان اسقاربەكوۆ كومپانيانىڭ ديرەكتورى ءارى CEO-سى رەتىندە كورسەتىلگەن. ونىڭ ەكى قىزمەت بويىنشا دا وكىلەتتىگى 2 قازاننان باستالعان.
كومپانيانىڭ نەگىزگى قىزمەت باعىتى رەتىندە باعدارلامالىق قامتاماسىز ەتۋدى ازىرلەۋدى تاڭداعان. ول جاساندى ينتەللەكت، روبوتوتەحنيكا جانە اۆتوماتتاندىرۋ سالالارىنا ارنالعان تەحنولوگيالىق شەشىمدەر ازىرلەۋدى جوسپارلاپ وتىر.
سونداي-اق ونىڭ قىزمەت اياسىنا باعدارلامالىق ونىمدەردى تەستىلەۋ، ءتۇرلى جۇيەلەردى ينتەگراتسيالاۋ، عىلىمي-زەرتتەۋ جانە تاجىريبەلىك-كونسترۋكتورلىق جۇمىستار جۇرگىزۋ كىرەدى. بۇدان بولەك، كومپانيا وسى باعىتتار بويىنشا تەحنيكالىق قولداۋ كورسەتپەك.
تىزىلىمدەگى اكتسيونەرلەر قاتارىندا Circle Limited كومپانياسى كورسەتىلگەن. كومپانيانىڭ كاپيتالى ارقايسىسىنىڭ نومينالدى قۇنى 1 اقش دوللارىن قۇرايتىن 100 جاي اكتسيادان تۇرادى. ال جاريالانعان اكتسيالارىنىڭ جالپى قۇنى – 100 دوللار.
