اۋىل شارۋاشىلىعى ءمينيسترى ەربول شىراقپايۇلى پرەزيدەنتتىڭ بىرقاتار تاپسىرماسىن ورىنداماي ءجۇر. بۇل تۋرالى «شوپان اتا» ۇلتتىق بىرلەستىگىنىڭ توراعاسى الماسبەك سادىرباەۆ ايتتى, دەپ حابارلايدى “ادىرنا” ۇلتتىق پورتالى.
ايتۋىنشا، اۋىل شارۋاشىلىعى ءمينيسترىنىڭ قازاق شارۋاسىنا جانى اشىمايدى.
“وتكەن جولعىدان كەيىن ءمينيستردى وفلاين ومىردە ەكىنشى رەت كورىپ تۇرمىز. كورە المايمىز، ءتىپتى جينالىستارعا دا قاتىسپايدى. ۆيتسە-مينيسترلەرمەن الەك بولامىز. بىراق ول كىسىلەر ەشتەڭە شەشە المايدى. سونىمەن بارلىعى ۇزىن قۇيىمشاق بولىپ قالادى…
بىلتىر ماڭعىستاۋدا جۇت بولعاندا ەربول شىراقپايۇلىنىڭ ايى وڭىنان، جۇلدىزى سوڭىنان تۋدى. ويتكەنى، جەم-ءشوپ ماسەلەسى بويىنشا الدىنداعى ءمينيستردى شەشۋگە جىبەردى. ەڭ ءبىرىنشى تاپسىرماسى سول بولدى. ماسەلە شەشىلگەن جوق. پرەزيدەنتتىڭ ءبىرىنشى تاپسىرماسى شەشىلگەن جوق. بۇگىنگى كۇندە سول ماڭعىستاۋ جەم-ءشوپتى ءوز كۇشتەرىمەن سولتۇستىكتەن تارتىپ وتىر. قىزىلوردادا بۇل ماسەلە وزەكتى”،- دەدى الماسبەك سادىرباەۆ.
سونداي-اق، ول ۆەتەريناريا سالاسىن دا وزەكتى ماسەلەنى قوزعاپ ءوتتى.
“ۆەتەريناريا سالاسىنا كۇردەلى رەفورما جاسالمادى. ۆەتەريناريا ماسەلەسى شەشىلمەدى. ۆەتەرينارلاردىڭ ايلىعىن بولار-بولماسقا، الدامشى پايىزعا ءوسىردى دە، ءبىتتى. رەفورما ول ەمەس. سىزگە پرەزيدەنت ۆەتەرينارلاردىڭ ايلىعىن ءوسىر دەپ قانا بەرگەن جوق، رەفورما جاسا دەپ بەردى. رەفورما دەگەنىمىز - بۇكىل باعىتتى وزگەرتۋ، مەملەكەتتىك ۆەتەريناريادان كاسىبي ۆەتەرينارياعا اۋىسۋ، جەكە-مەنشىك ۆەتەريناريانى قوسۋ، جەكە-مەنشىك لابوراتوريالاردى قوسۋ. ءسىز پرەزيدەنتتىڭ ەكىنشى تاپسىرماسىن دا ورىندامادىڭىز”، - دەدى سادىرباەۆ.
ودان بولەك، پرەزيدەنتتىڭ كەلەسى تاپسىرمالارى ورىندالماعانى تۋرالى دا ايتا كەتتى. اتاپ وتسەك، جەكە قوسالقى شارۋاشىلىق تۋرالى زاڭ قابىلدانبادى. ىشكى وڭدەۋدى 25%-عا ارتتىرۋ تۋرالى تاپسىرما دا ورىندالماعان. سۋبتسيديالاۋدىڭ ماسەلەلەرى دە شاش ەتەكتەن.
“ەڭ سوراقاسى - ەربول شىراقپايۇلى ءتورت تۇلىگىمىزگە كورسەتىلمەگەن قولداۋدى، 80% سۋبسيديا تۇرىندە شوشقا شارۋاشىلىعىنا بەرۋگە دايىن ەكەنىنە كوزىمىز جەتتى. قازاق شارۋاشىلىعىنا جانى اشىماعان جەردە وسىنداي پروبلەمالار شىعا بەرەدى.
پرەزيدەنتتىڭ تاپسىرماسىن ورىندامايتىن، حالىقتىڭ مۇددەسىن العا سالمايتىن، 60 000 ادام قول قويعان قۇجاتتى ەلەمەيتىن مينيستر سىزگە كەرەك پە؟”،- دەدى اگرو-ەكسپەرت.
